موشح للسيده زينب ع
----------------------------------------------

هاي  زينب لليسر  يسبونهه
حسرة  الخوه تظل بعيونهه
***
كل  عشيره   لو  حدث   يلفونهه
صعبه   وياها    العده   يحدونهه
اشلون زينب  بالبراري  اضعونهه

خاف هاشم باليسر ينسونهه
***
ليل هاشم  كون ما يغمض جفن
والمصايب  صارت  ابثگل المتن
ظلت اتعيش الفواطم بس حزن

هاي زينب بالهضم يدرونهه
***
نارها الما تطفه ظلت بالخيام
لمت  الأيتام  من جن  الظلام
حيرة الحره وسط هاي اللئام

ردنه  لليسأل عليهه  اشلونهه
***
يجرح الحداي لو يمشي الضعن
ليش زينب  حايره ابهاي المحن
عاشت الغربه اشكثر عن الوطن

صار  بالدمعه  الحزن  چانونهه
***
كون طارشهم يصل وادي النجف
للغري   متعني    بالدمعه   هتف
شوف زينب عاين الموقف كلف

تريد منكم  سيدي  اتحضرونهه
***
صارت  الكوفه  عذاب  العايله
شيبتهه  اجروح تشرح   كربله
ظلت  الوليان  فوگ  امجندله

ردنه هاشم تفزع  ايشوفونهه
***
ودعت  وليانهه وتحچي المصاب
تمشي والأحباب فوك عله التراب
اجروح ظلت بالسبي ونار العذاب

تهمل  الدمعات ويلي اجفونهه
***
عاشت   الونه  ودواوين  الجرح
وشافت الخوان فوك عله الرمح
صوت من الاه  لو طر كل  صبح

ظلت الحسبات  تحچي اظنونهه
***
عاشت   الشام  ابهضم   آلامهه
وطبت  المجلس  جرح  ايامهه
ويلي شيبهه  القهر  من شامهه

ليش ما انصف دهرها وكونهه
***

تمت بعون الله تعالى الشاعر__يوسف_الفتلاوي

إذا مررت من هنا فأقرأ دعاء ألفرج

✨اَللّـهُمَّ كُنْ لِوَلِيِّكَ الْحُجَّةِ بْنِ الْحَسَنِ صَلَواتُكَ عَلَيْهِ وَعَلى آبائِه في هذِهِ السَّاعَةِ وَفي كُلِّ ساعَة وَلِيّاً وَحافِظاً وَقائِداً وَناصِراً وَدَليلاً وَعَيْنا حَتّى تُسْكِنَهُ اَرْضَكَ طَوْعاً وَتُمَتِّعَهُ فيها طَويلاً برحمتك يا أرحم الراحمين.

🕊 دُعاء الفرَج

يمه لتسألين عن ضعني وكفيله
ودعت عباس وانه اعلى الهزيلة
شافني وشفته وبجيـت
ومن وجع متني اشتكيت
كون عنده جفوف جا كام اعلى حيله
ــــــــــــــــــــــــــــــــــــــ
يمــه لتسألينــي عنـه والله ياذينــي السؤال
يمــه راح الدللانـــــي وراح ويــــاه الدلال
توسد الشاطي وجفاني وخدري وي جفوفه شال
ومن لهد ماراح وانه وي الخدر موش اعلى حال

يمه اخبرج خدري مات
عفته يم شاطي الفرات
وجتفوني وكالت الوادم ذليله
ودعت عباس وانه اعلى الهزيلة
ــــــــــــــــــــــــــــــــــــــ
كطعو ايده وجتفو ايدي وبالغصب صار الفراكَـ
يمه جافــاني الكفلني والغريب بضعنــي ســاكَـ
حته ما خلوني اشمه وجنت كلش كَلبـي طــاكَـ
يمه ماشفت بحياتـي وداع من فــوك النيـــاكَـ

هـذا جـــــان اخر وداع
من بعدها وخدري ضاع
كَتله خويه وداعة الله ودمعي اسيله
ودعت عباس وانه اعلى الهزيلة
ــــــــــــــــــــــــــــــــــــــ
مرو الناكَه اعلى جسمه وشفته مطروح وشكيت
وكتلــه يا عباس خــويه متني يوجعنـي وبجيت
محمله عتاب وبواجي وردت اعــاتب واستحيت
شفته ثلث اوصال صاير عميه عيني وما حجيت

عافنــي وماكَـتله ليـش
كَتله بس ماريد اعيش
عمري من بعدك عسى ايامه قليلة
ودعت عباس وانه اعلى الهزيلة
ــــــــــــــــــــــــــــــــــــــ
ودعت والناكَة تمشي موادع المستعجليـن
والسبانه يسوكَـ مسرع واحنا فوكَـ مجتفين
انه مربوطات اديه وهو شفته بلايه ادين
يا اخو واخته كبلنا ابهالوضع متـوادعين

شلون حاله المن بعيد
يودع وما عنـده ايــد
والمجتف حيره يا جف اليشيله
ودعت عباس وانه اعلى الهزيلة
ــــــــــــــــــــــــــــــــــــــ
من عمت عيني اعلى عينه ومن عسن حيلي انهدم
يمه شفت اصبيهـا طــافي وبيهـــا مكســــور السهم
ردت اشـــوفن عينه ذيجـــه وطلعت مغطيهـــا دم
يمه الله يعين كَلبــي الحتى مــن هــــاي انحـــــرم

كَتله بعـدك يالحنيـن
رايحة وما ادري وين
يمه ابو فاضل هدم حيلي برحيله
ودعت عباس وانه اعلى الهزيلة
ــــــــــــــــــــــــــــــــــــــ
ما وكَف حادينه يمه وساكَو النوكَـ ومشت
وسالفة خدري الفكَدته من هالوداع وبدت
هاي اول مرة ابجي كَبال عبـاس وسكت
والمشو بضعون زينب ناس ماعدهم بخت

راح اخوي وخدري راح
كــون امــوتن واستراح
عكب اخوي الخدر مو صاحب طويلة
ودعت عبــاس وانــه اعلى الهزيلة
ــــــــــــــــــــــــــــــــــــــ
عن ابوفاضل سؤالج شرد اجاوب فكري حار
ويـــاي مــاقصر ييمه شمــا اكله يكلـي صار
جان طوله فياي اليه شما علت شمس النهـار
هسه جافاني الحنين وطوله غاب ودهري دار

عكبه دولبني الزمان
وصرت كل يوم بمجان
حكَه من يموت اليفاركَـ خليلة
ودعت عباس وانه اعلى الهزيلة


رائد الناشي

#اللهم_عجل_لوليك_الفرج

[دفنت الامام الحسين ع ]


يحفار اللحد    وسع الملحوده
يحفار اللحد    جبدته ممروده
يا عمه شربه امن النحر
هلبت بقه ابجسمه اثر
وسع الملحوده
__
مو تدري ما عندي كلبي ماكلت عمتي اتاني
ياعمه سولفلي اشفت من أدفنت خواني
يدرون بيه ابيا كتر هم نشدو اعله امجاني
مشتاكه لبن امي اشكثر اتمنيت اروحن اني

يعمه والدك   حجيلي عن علومه
يعمه والدك   شضال من ارسومه
سولفلي اذا عندك خبر
هلبت بقه ابجسمه اثر
وسع الملحوده
__
لمن وكفت اعله الجسم حيره يمعه ابحيره
انشيل الكتر يوكع كتر امبين السحك تأثيره
جسمه الموذر عالترب كوه انجمع بحصيره
ياعمه لبن امج تره سويت خفره اجبيره

اوسده باللحد  والرمح بضلوعه
اوسده باللحد  ونته مسموعه
طلعت رمحه امن الضهر
هلبت بقه ابجسمه اثر
وسع الملحوده
__
نكطت ماي اعله النحر كلبي نكسر للعطشان
خيل وذبح حر وعطش وماضال شي ماذبلان
ممرود اخوج امن الشمس وتلاثه ضل عالتربان
بجفوفه اكو خنصر نقص دورت كل الميدان

يعمه منحره  طبره بي موجوده
يعمه منحره  صار عالملحوده
الماسلم راسه امن حجر
هلبت بقه ابجسمه اثر
وسع الملحوده
__
حطيت طفله اعله الصدر وتشابكو نحر ابنحر
ورشيت ماي اعله الكبر وخليت دمعاتج اثر
هلبت يخضرن عالكبر ويصير يم كبره نهر
ويرتوي الضامي امن العطش ويردله عباس كمر

يعمه اعله الضهر   باقي فكد الخوه
يعمه اعله الضهر   اثر من اتلوه
الطاح وبقه متاني كمر
هلبت بقه بجسمه اثر
وسع الملحوده
__
عالمشرعه لمن رحت ياعمه ملتمه الناس
كالو يم شاطي النهر جثت بطل ما تنقلس
نشدوني والمدمع نزل جاوبت عمي العباس
كافل خدر بت فاطمه يسمونه راعي النوماس

ادور عالنهر     هلبت الكه جفوفه
ادور عالنهر      رايته الملفوفه
من شافني ابروحه اعتذر
هلبت بقه ابجسمه اثر
وسع الملحوده
__
سيد بسام الياسري

الحمدلله الذي عرفني نفسه ولم يتركني اعمى القلب

الحمدلله الذي جعلني من أمة مُحمد صلى الله عليه وآله

الحمدلله الذي جعل رزقي في يديه ولم يجعل رزقي في أيدي الناس

الحمدلله الذي ستر ذنوبي ولم يفضحني بين الخلائق

خُلصت الخدمة       رجعت الغربة
چلمة العودة         تذبح و صعبة

ــــــــــــــــــ 

خُلص عمري لمن خلصت خدمتي
احس كلشي انتهى ونزلت دمعتي
مثل موت الورد ذبلت لهفتي
شبه غربة ظعن زينب غربتي


وحشة الوحشة       صارت بدربه
چلمة العودة        تذبح و صعبة

ــــــــــــــــــ

بدت وحشة الطريق ابلايا زاير
واحس غصة اعله ضلعي وجنها حافر
ألِم گوة بدمعتي وصرت اكابِر
ورجع قلبي سمع هل من مناصر


لهفة عيوني           بالدرب تربه
چلمة العودة        تذبح و صعبة

ــــــــــــــــــ

أشد موقف إذا الموكب نسدة
إذا الچادر بعد عشرة نهدة
نهاية وموسم الخدمة شيردة
مثل ماي بترب لمن تبدة


الخادم يعاني        من جمر قلبه
چلمة العودة        تذبح و صعبة

ــــــــــــــــــ

فلا نلگة مثل هل خدمة هاية
عشگ ابن النبي أعظم حكاية
جميلة الخدمة بس من البداية
حزينة مؤلمة وصعبة النهاية


صعبه هالعشرة         تخلص بحسبة
چلمة العودة           تذبح و صعبة

ــــــــــــــــــ

لمن امشي وارد وحشة المدينة
الجفن غيمة مطر عيني الحزينة
گضت يا وسفة الايام الحنينة
تاذي جلمة العودة علينة


تاذي هالچلمة              سهم بالجربة
چلمة العودة             تذبح و صعبة

ــــــــــــــــــ 

تمت ببركة مولاي الحجه
 الشاعر زين العابدين الشمري 

كتبت في طريق المشاية 

نصاري

استشهاد الرضا ع

هذا موتك يالرضا يمك حظر
بس اشوف الكربله درت النظر
من تذكرت الضلع  انحصر بعيونك دمع
****
شنهو مر بخاطرك / ونته موت امجاورك
بينك وبين المنيه دمعه وحده
هذا چبدك بالطشت / ونته للطف تلتفت
انسيت جرحك والحزن فوگك تبده
تريد تنحب يالرضا / عله ضلوع مرضرضه
وعله الثلموها ابسهم مرتين چبده

بجرحك اوتقره الزياره امن البعد
ياسلام الله اعله نحره والچبد
تقره بس ما تنسمع  انحصر بعيونك دمع
****
يا غريب بلا وطن / رموش عينك حدبن
دمعة الغربه ثجيله وبيها حرگه
شاغلك چنه الضعن / الزينبيات انسبن
هايه ينرادلها يالمسموم شهگه
حرمه ما بين الغرب / وسفه عمتك تنضرب 
متون زينب من ضربهم لسه زرگه

بچبدتك ما فكرت لا غربتك
بس شغل بالك سبيها عمتك
امصابها ما ينجرع  انحصر بعيونك دمع
****
هذا مو موتك اضِن  / العرّگ اجبينك حزن
كل مصايب كربله بگلبك جرحهن
دمعك الينزل حمر /  يرسم بعينك نحر
گطره گطره اتطيح عالخد وتلمهن
شما كثر بيك الالم / اگبالك اتصير الخيم
تشوف چم طفله وطفل يسحگ جمرهن

تبچي وگبالك شفت منهو العثر
تركض وتوگع رقيه اعله الحجر
ظل جدمها بي طبع  انحصر بعيونك دمع
****
يالعميت امن البچي / إبلهاتك غص حچي
يبن موسى اتريد تذكر يافجيعه
صبت اجبينك نهر / چنك اذكرت الگمر
ويلي عالعباس وچفوفه گطيعه
عينه صكاها السهم / وطاح من عنده العلم
وتالي وي جوده تبده اعله الشريعه

سكنه يم خيمتها ضلت تنتضر
ما اجه العباس بس جاها الشمر
وسفه سكنه تندفع  انحصر بعيونك دمع
****
بعد تنضر ياجرح / راس جدك عالرمح
وللرمل مكشوف ظل حسين نحره
رحمة الحافر شمر / والجرح ما يستقر
العشره فزعن ونمرد عالغبره صدره
كل مكان بكربله  /  بيها طاحت وصله اله
وبالعبايه اتعنت اتلمهن الزهره

يالرضا جدك تسلب ونسحگ
والترف صدره على ضهره انطبگ
ونگطع منه صبع  انحصر بيعونك دمع
****
بين حسرات وشجن  / تربي عينك للچفن
تدري جدك ظل ثلاثه اعله الترايب
من اجه وكت الدفن / انترست الدنيا حزن
السماء ابدفنته شافت عجايب
امن البچي اوليده انعمه / بالحصيره لملمه
اگبال هالموقف تره ازغيره المصايب

علي السجاد امن اجه ايلم الجسم
بكل اراضي كربله ظل بي يلم
جسمه صعبه ينجمع  انحصر بعيونك دمع
****


الشاعر اياد الديراوي

على وزن قصيدة احنه غير حسين ماعدنه وسيله

من زيارة وارث وجود الكفاله
ومن خلال المنبر،نوجه رساله

فليجب كل حسينيا مطيعا
واجبا اختاه تطبيق الشريعا

انواسي دمعات العقيله والثكاله
ومن خلال المنبر انوجه الرساله


اولا لبس الحجاب واجب اعلينه وفرض
وخلي خطواتچ رزينه اتهاب من عدها الارض
العدو عينه علينه يريد بس زله يكض
واحنه زينب علمتنه اسلاحنه اتكون العبايه



وكلنه كون انصير قدوه بهالمسيره
نحيي كون بهاي مضمون الشعيره

كل عاماً بالدمع نحيي الفجيعا
وعلى درب الهدى نمشي جميعا

والشفاعه اتنولها بس من خلاله
ومن خلال المنبر انوجه الرساله


التحيي كون الاربعين موفقط تبچي وتنوح
كون بيه اداوي زينب موتزيدلها الجروح
بالخطى اتمثل العقيله بالدرب لمن تروح
تكتب العفه شعار الزينبيات اعله رايه

نكتب العفه شعار الزينبيه
والحجاب النه صبح عز وهويه

شكلكِ بالعفه يا اختي بديعا
وبهِ تشفى جراحات الشفيعا

وتنشمل عند العقيله بالكفاله
ومن خلال المنبر انوجه الرساله


الچ يا أختي نصيحه والوضع كلش خطير
خلي كون الحره قدوه لو نويتي اعله المسير
هواي عدنه من يضدنه ناس منزوعت ضمير

اعيونها تتربص النه اتريد تسقيط الولايه

الشجاعه اتكون بالعز والاراده
وحتشام المرأه من ضمن العباده


كل من كانت الى زينب مطيعا
فلتكن في الاخره هي الشفيعا

والسجل معروض يم رب الجلاله
ومن خلال المنبر انوجه الرساله

قلمي ام حوراء البركاوي
تمت ببركة مولاتي زينب عليها السلام

خلصت يخوتي ورديت ،، آنه وضعني وأحزاني
اومي اعليكم امن ابعيد ،، اشو محّد تلگاني

خلصت رحلتي للشام ،، بس ما خلصت الامي
بعيوني سوالف نوگ ،،وبعدني ابچي على اخيامي
ترى بعده الغريبه إسمي ،، وبعدني تايهه إجدامي
وبعدني امحزّمه للضيم ،، امن اهد ماراحو اخواني

بچاني السبي والضيم ،، وكسرت خاطري الغربه
ها يحسين گوم وشوف ،، صرت من الهضم گصبه
مشوني مشي الملحوگ ،، والشام اشبعد دربه
ياخويه وحچي الشمّات ،، بسكوت ابچي خلّاني

إمباوگ انحب اعله النوگ ،، من عفتك لهذا اليوم
مچتوفه أربعين أيام ،، وابچي اعليك يامظلوم
ما ألطم عليك اشلون ،، وإنت إبلا چفن واهدوم
بعدني ما شربت الماي ،، عليك ويابس الساني

يابس ريجي من الخوف ،، وشمّاتي علي حراس
فز خليني أرد وياك ،، تعبت أمن الحچي والناس
من ذاگ الظهر لليوم ،، ما مرتاحه ياعباس
هد حيلي عذاب الشام ،، ومشي الليل أذاني

أذاني المشي بالليل ،، وأنهار السبي يعمي
أمشي گوّه واثمانين ،، يتيم امچلب ابهدمي
اشكثر هضموني ياعباس ،، ترى وحادينه مو نشمي
اليطيح امن الهزل ينعاف ،، غير المات بحضاني

من هضم السبي اتمنيت ،، لو ميته اعله ذاگ التل
درب هيمه اعله مد الشوف ،، ماينطر بلا محمل
وطبينه ابخرايب سود ،، بيها ايموت الامدلل
إگعدو وخل اسمعكم ،، وين الدهر ودّاني


إگعدو يخوتي هالجيت ،، وجبتلكم يتاماكم
أريد انكت اتراب الشام ،، واگعد اشتكي إحذاكم
انسبينه مثل سبي الروم ،، ومن خلصت اجيناكم
من الشمس وأمن الضيم ،، محد يعرف الثاني

احمد الهلباوي

إلى الحُسين...امنين ماتِتِّجِه.... تِلگه خِدمه

عله طول الزمن...يكرم ابشيعته
مثل اخوه الحسن...مايكُف سُفرته
اشما يزيد العَدَد...واسعه حظرته
(كَمَن زار العرش)...اليگصد ازيارته

عنده جَنَّه بالسِّمه وعالأرض جَنَّه
واليريد الجاه لَعتابه ايتعنَّه
أبو الخير اسمه لأن كل خير مِنَّه

گلبه الحنين...مثله ماينوجد... كِلَّه رحمه
إلى الحُسين...امنين ماتِتِّجِه.... تِلگه خِدمه
.......................................
يستحق هالشَّرف...وابد ماكو عَجَب
عله ساگ العَرِش...حسين إسمه انكتب
يرتقي اليخدِمَه...مَلِك عنده انحِسَب
لجل عينه صُبَح...راحه عدنه التَّعَب

مُرَّه دنيانه وفقط أيَّامه حلوه
ايروح كل غالي لبو السجاد فدوه
إحنه لوما خدمته كلشي مَنِسوه

نحچي ابيقين...واليِضِد يندِثِر ....حتى إسمه
إلى الحُسين....امنين ماتِتِّجِه.... تِلگه خِدمه
......................................
بالسِّمَه وبالأرض...رحمة الله انجَعَل
ومرقده وحظرته...صارن أشرف مَحَل
ننحب العيلته...والمُصابه الجَلَل
ونبقه خِدَّام اله...ومانعرف المَلَل

نجبر المهدي ابعزانه ولطم الصدور
والله ننسه ارواحنه وماننسه عاشور
وفاطمه الخادم حسين اتگله ماجور

ماتبچي عين...باچر الخادِمَه ....وغيره يِعمَه
إلى الحُسين...امنين ماتِتِّجه... تِلگه خِدمه
......................................
حسين عنده خَدَم...تِفتِدِيه بالدِّمه
على طول السَّنَه...الخِدمِتَه امحَزِّمه
تحتوي ازيارته...تعجز الأنظمه
عالعَوالِم صدگ...يختلف عالَمه

أبهَر الكون ابفيوضاته وعطائه
وابخدمته اتشرُّفَت أرضه وسمائه
الله شاء اتكون قِبِله كربلائه

والمؤمنين...امن الشَّرِق والغَرِب...تِلفِي يَمَّه
إلى الحُسين...امنين ماتِتِّجِه... تِلگه خِدمه
.....................................
من مُحَرَّم إلى...أربعين العِشِگ
يالتريد الصدگ....هو هذا الصدگ
الگلب بِمحَبِّته...صار نبضه يدگ
عِشره وي خِدمِتَه...وعنهه مانفترگ

عالمنابر إحنه دوم انصيح ياناس
مَحَّد ايبَيِّض وجهنه ويرفع الراس
غير ابو اليِمَّه واخوه الگمر عباس

طول السنين...عَهَد نبقى خَدَم...للأئمه
إلى الحسين...امنين ماتِتِّجِه...تِلگه خِدمه

سيد علي الموسوي

‏مقطع صوتي من mlahythmallamy

جيتك اوجبت الراس وياي
واعله الكَبر رشيتلك ماي
اه يعطشان

...1...
جيتك وجبت الماي وياي ارد ارويَّك
مذبوح جبدك بالعطش يا خوية ادريك
ألماي شح اعليه ذاك اليوم انطيك
هسه انه جبته اوياي الك بلكي الله يحييك

عطشان عفتك يوم الاطفوف
ما بيك حيل اترد الاسيوف
وحيل تعبان





...2...
من بعد ضيم الشام اجيتك يابن امي
بالكوه امشي اعله الجدم كايدني همي
جم ليلة مرت وانت غايب ماهو يمي
رديت الك مو زينب، المسبية اسمي

ابنوك الهزيله الشام طبيت
وبسوكهم جم شامت الكيت
امتاني الي جان
.....3.
مر تسعه وتلاثين يوم اعلية غايب
ماشفت طولك يالنمت جوه الترايب
كوم اعله حيلك يالعليك الكَلب ذايب
افراكَك كتلني وعاشت ابروحي النوايب

بعدك يخوية حالي يا حال
وياك راحت راحت البال
والكَلب حزنان
...4...
كبرك وصلته اكعد يخوية اتلكه أخيَّتك
عطشانه تدري الشوفتك وانته ابغربتك
زيح التراب وكوم روايني كشختك
ما ريد اشوف اسهام بيك ولا ذبحتك

مشتاكه اشوفك ببيض الثوب
واكف تصلي فرض الاغروب
حان الاذان
...5...
جبت الدرب وي روحي اسولف يابو الاكبر
هلبت ارد والكاك سالم ما موذر
ويطلع خبر موتك جذب ما لايحك شر
وابعيني اشوفك سالم اعله اخيامي تفتر

وعبدالله فوك امتونك الكاه
شابع ضحك ما شابع اضماه
موش ذبلان

.....6....
جيتك يخويه ابلا نبض كلبك رقية
بذيج الخرابه انه ادفنتهه ابهاي ادية
من جابو ابطشت الذهب راسك اليه
اتلكته بلهفه وشبكَته شبكت منية

ما ودعتني ماتت ابساع
وانه ادفنتهه بدمعة اوداع
جوه تربان
........
✍️

كلمات موسى الخادم

رجوع ضعن مولاي الحسين عليه السلام الى كربلاء ولسان حال مولاتنا الحوراء عليها السلام

يمته اوصَلِ اگبور اخوتي
ماضل صبر ياناگتي

أنه المِن أول اسنيني...ودُوَت نار الحزن بِيِّه
وعگب عين اهلي واخواني..الوكت خَلاَّني مَحنِيَّه
إجيت الكربله ابهيبه...اطلعت من عدهه مسبيه
واخيراً راح ارد الهه...ابليالي الأربعينيه

ابحسرتي ولوعتي ودمعتي الهامله
أنحب ابطلعتي ورجعتي الكربله

أرد اشتكي...من غربتي
ماضل صبر...ياناگتي
..................................
رحت لكن غَصُب عَنِّي...ومشيت ابگلبي واحزانه
هدم ركن الصبر ضيمي...وكبرت ومو هذيچ آنه
تجرحه ايّامه واسنينه...ويموت الفارگ اخوانه
أريد اوصل واگلّلهم...إختكم والله تعبانه

تعَّبني الجرح واليسر ياهلي
واسمع الشامت اينادي يابت علي

شفت الهظم...من شامتي
ماضل صبر...ياناگتي
......................................
علي السجاد اشوفنَّه...على حسين اشكبر هَمَّه
نحيل وحزنه يبراله...ويسيل امن الحَبَل دَمَّه
صحت وينك علي بويه...وينچ فاطمه يُمّه
ضعينه اتلاثه واثمانين...كلهه اتنادي ياعَمَّه

حيره اتحيَّرت بالضعن والقهر
يمته اوصل وابث شكوتي للكمر

تحچي الجَرَه...خل دمعتي
ماضل صبر...ياناگتي

سيد علي الموسوي

جدد العهد مع امام زمانك 🕊️☘️👇

🕊✨دعاء الفرج🕊✨


۞اَللّهُمَّ۞
۞کُنْ لِوَلِیِّکَ۞
۞الْحُجَّةِ بْنِ الْحَسَنِ۞
۞صَلَواتُکَ عَلَیْهِ وَعَلی آبائِهِ۞
۞فی هذِهِ السّاعَه وَفی کُلِّ ساعة۞
۞وَلِیّاً وَحافِظاً وَقائِداً وَناصِراً وَدَلیلاً۞
۞وَعَیْناً حَتّی تُسْکِنَهُ أَرْضَکَ۞
۞طَوْعاً وَتُمَتِّعَهُ فیها۞
۞طَویلا۞

برحمتك يا ارحم الراحمين

صباحكم حوائج مقضية ببركة محمد وال محمد