tgoop.com/rdeaa/39377
Last Update:
رجوع ضعن مولاي الحسين عليه السلام الى كربلاء ولسان حال مولاتنا الحوراء عليها السلام
يمته اوصَلِ اگبور اخوتي
ماضل صبر ياناگتي
أنه المِن أول اسنيني...ودُوَت نار الحزن بِيِّه
وعگب عين اهلي واخواني..الوكت خَلاَّني مَحنِيَّه
إجيت الكربله ابهيبه...اطلعت من عدهه مسبيه
واخيراً راح ارد الهه...ابليالي الأربعينيه
ابحسرتي ولوعتي ودمعتي الهامله
أنحب ابطلعتي ورجعتي الكربله
أرد اشتكي...من غربتي
ماضل صبر...ياناگتي
..................................
رحت لكن غَصُب عَنِّي...ومشيت ابگلبي واحزانه
هدم ركن الصبر ضيمي...وكبرت ومو هذيچ آنه
تجرحه ايّامه واسنينه...ويموت الفارگ اخوانه
أريد اوصل واگلّلهم...إختكم والله تعبانه
تعَّبني الجرح واليسر ياهلي
واسمع الشامت اينادي يابت علي
شفت الهظم...من شامتي
ماضل صبر...ياناگتي
......................................
علي السجاد اشوفنَّه...على حسين اشكبر هَمَّه
نحيل وحزنه يبراله...ويسيل امن الحَبَل دَمَّه
صحت وينك علي بويه...وينچ فاطمه يُمّه
ضعينه اتلاثه واثمانين...كلهه اتنادي ياعَمَّه
حيره اتحيَّرت بالضعن والقهر
يمته اوصل وابث شكوتي للكمر
تحچي الجَرَه...خل دمعتي
ماضل صبر...ياناگتي
سيد علي الموسوي
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/39377