tgoop.com/the_bakiroo/7678
Last Update:
Бузиб-қуришлар, кўчиришлар, компенсациялар кимнинг ҳисобидан?
Бухоронинг ҳокимтўрасига бир йил аввал айтилган "Бухоро туризм маркази аҳоли ва UNESCO рухсати билангина бошқа ерда қурилиши" ҳақидаги баёнотини эслатиш энди бефойда. Бухоро Туризм марказини шаҳар марказини бузиб қуришади, бу бўйича аллақачон қарор қабул қилиб бўлишган.
Лекин шу зорманда "банкет" кимнинг ҳисобидан бўлишини барибир тийинигача очиқлашлари керак бўлади?
Биринчидан, 27та объект, уларнинг орасида улкан стадион, вилоят ва шаҳар ҳокимиятлари, кутубхона, коллежгача бор, демонтажи қанчага тушади? Демонтаж харажатлари кимнинг ҳисобидан?
Иккинчидан, объектларни кўчириш, транспорт ва логистика харажатлари, вақтинча ижара тўловларинининг ҳисоби баҳоланганми? Буни ким тўлайди?
Учинчидан, объектлар орасида бир нечта хусусий мулклар ҳам бор, уларнинг компенсацион қиймати қанча? Компенсация тўлови кимнинг ҳисобидан ва қачон тўланади?
Тўртинчидан, “Bukhara city” ҳудудига кўчирилиши айтилган давлат объектларининг қурилиш қиймати қанча? Бу қийматни ким тўлайди?
Бешинчидан, Бухородаги 6-микрорайон ҳудудида қурилиши айтилган стадионнинг (ҳокимтўрага кўра 20 минг ўринли, архитекторга кўра 25 минг ўринли) қиймати қанча? Янги стадион қурилиши кимнинг ҳисобидан молиялаштирилади?
Олтинчидан, меҳмонхоналар, анжуманлар саройидан иборат Туристик мажмуанинг қиймати қанча? Унинг қиймати, молиялаштириш манбалари қандай?
Еттинчидан, гўёки мажмуани қурадиган, номи айтилмайтган, ҳокимлар-у, вазирлар атрофида гирдикапалак "хорижий инвестор" ким? Шунча эътирозларга қарамай, фойдасига бутун қадимий шаҳарнинг қоқ марказидан воз кечиб юборилаётган ўша инвестор буюртмачими, пудратчими ё бўлажак мулкдорми? Ё ҳаммаси биттами? Унинг мақоми қандай?
Саккизинчидан, бу хорижий инвестор маблағларининг манбаи ва келиб чиқиши қаердан? Кредит оладими? Ё сопини ўзидан чиқариб бериладими? Ё уч карра қимматлаштирилган бошқа бирон лойиҳа ясаб бериладими?
Тўққизинчидан, 2025 йилдаги йиллик саммити Ўзбекистонда ўтадиган ЮНЕСКОдагилар нима дейди? Ўтган йили лойиҳага қарши бўлган ташкилот, бу йил розилик бериб турса, биз сукут сақлашни ва жимликни уддаласак ҳам, халқаро ҳамжамият савол бериши табиий. Бу бўйича репутацион харажатлар қиймати баҳоланганмикан?
Бузишлар, қуришлар, компенсациялар, йўқотишлар қўшилиб, умумий қиймати қанча? Ҳисоб-китоби борми? Ё охирида ҳисобланадими?
BY bakiroo
Share with your friend now:
tgoop.com/the_bakiroo/7678