Упершыню бачу фотазыдмкі гэтага касцёла, відаць, яны нідзе не публікаваліся. Гэта драўляная капліца Святога Антонія ў вёсцы Паласня Стаўбцоўскага раёна, якая была знішчаная саветамі ў час антырэлігійнай кампаніі ў 1960-я гг.

Ніякіх сведчанняў, калі быў пабудаваны гэты храм не знайшоў. У яго архітэктуры здзіўляюць дзве рэчы.

Па-першае, абсалютна глухі галоўны фасад, глухая званіца. Хутчэй за ўсё ўваход з супрацьлеглага ад таго месца, дзе рабіўся здымак, але ўсё роўна вельмі незвычана, хоць бы акенца, шчыліну якую зрабілі.

Па-другое, абсалютна не чакаў і ніколі не бачыў, каб на драўляным касцёлы быў сапраўдны механічны гадзіннік. А тут - гадзіннік на вежы могілкавай капліцы. Як? Адкуль? Калі? Навошта? Столькі пытанняў адразу выклікае гэты элемент.

Фотаздымкі выклала парафія Св Казіміра Стоўбцы ў Стоўбцах. Ёй з вёскі Паласня перадалі некаторыя рэчы, у тым ліку рэлігійныя кнігі пачатку XVIII стагоддзя і арнаты з капліцы, якія былі схаваныя на гарышчы пасля яе разбурэння. Мясцовыя кажуць, што бляху, якая пакрывала дах капліцы, адвезлі на ферму ў Жыгалкі. А дрэвам, брусамі ды дошкам, дазволілі загарадзіць могілкі.

Стаўбцоўскі ксёндз спадзяецца адшукаць і абраз Святога Антонія Падуанскага, які быў у галоўным алтары капліцы.

Фота
#знаходкі #капліцы #касцёлы #могілкі #драўлянаедойлідства #Паласня