tgoop.com/salahkotb/1577
Last Update:
لما بتسقط مني صلوات سهواً، بقول ف نفسي هو أنا ليه مصليتش؟!
بحاول أفهم ايه المشكلة في دقيقتين تلاتة بتشكر فيهم الله على نعمه الكبيرة عليك. أتا متنعّم في فضل الله الحقيقية و بحمد ربنا دايماً سواء بالنيّة أو بالقول أو بالعمل الصالح، بس الصلاة هي على رأس القائمة من الأعمال اللي تشكر بيها الله.
فكرة إنك تدخل على الله و تقول الله أكبر و تبدأ بحمده و ترفع من الركوع بحمده و تكبّره و تنزّهه في الركوع و السجود. كل هذا حالة من شكر الله، و أنا لو قعدت أحمد ربنا على نعمه عليا مش هيكفي طول العمو الحقيقة. ف ايه المشكلة ليه مصليتش؟!
دقيقتين تلاتة هيتكرروا معايا ٥ مرات ف اليوم كله. يعني لا وقت، بس اللاوقت ده مُبارَك أنا اللي محتاجه مش الله سبحانه. بجد ليه لا ايه المشكلة؟!
انت بتدخل الصلاة مش عشان مُجبَر و لا مفروض عليك، انت بتدخل لأنك حقيقي محتاج لده، لنفسك، و بتعترف بالجميل و الفضل لله على كرمه عليك.
"ما يفعلُ الله بعذابِكُم إن شكرتم و آمنتم"
انت مش بتصلي عشان تُعطي الله حقه، و لا حتى لا يعذبك الله. ما يفعل الله بعذابكم إن شكرتم؟! انت بتصلي لأنك محتاج حقيقي لهذا الفضل و الكرم من الله.
جوهر الصلاة هو الامتنان. ما هو إحساس الامتنان لله ده من درجات الإيمان و الإحسان. ترجمة الإحساس ده بإنك تقضي دقيقتين تلاتة في صفاء تام و إقبال تام على الله.
الصلاة مش عادة و لا خير فيها ما دام أخلاقك سيئة و لا خير فيها ما لم تتقِ الله في حياتك و معاملاتك. و لو انت إنسان محترم و خلوق فالصلاة درجة أعلى لتهذيب النفس و الروح بقى.
لو انت بتحب الله سبحانه و بتردد بلسانك و بقلبك حبّه، و بتعمل الصالحات حُبّاً لله، فالصلاة درجة هترفعك أكتر.
الصلاة عبادة جميلة و لطيفة و بسيطة. لا تُقبِل عليها بدافع خوف أو إجبار. انت بتُقبِل على الله. بتاخد ميعاد مع مالك المُلك. اطلب منه براحتك و ادعي دي فرصة.
صح؟
#الرسالة_الصباحية_الجميلة
BY د.صلاح قطب
Share with your friend now:
tgoop.com/salahkotb/1577