نوێژی مانگ گیران

حوکم: سوننەتێکی موئئەکەدەیە

سەرەتای کاتی نوێژەکە: دەستپێکی مانگ گیران.

کۆتایی کاتەکەی (یانی ئەگەر تا ئەو کاتە نەکرابوو، ئیتر ناکرێت): بوونەوەی مانگ، یان دەرکەوتنی خۆر.
تب/ بە ئاوابوونی مانگ بە گیراوی، کاتی نوێژی مانگ گیران بەسەرناچێ.

چۆنیەتی نوێژەکە: دوو ڕەکعەت نوێژی ئاسایی لەگەڵ نیەتی نوێژی مانگ گیران، لەگەڵ ڕەچاوی سێ خاڵ:
١ـ لە هەر ڕەکعەتێکدا دوو جار رکوع دەبرێت، یانی دوای خوێندنی فاتحە و سوڕەتی دوای فاتحە رکوع دەبرێت، پاشان (سمع الله لمن حمده) دەکرێت و ئنجا (ربَّنا لك الحمد) و ئنجا دەستدەکرێتەوە بە فاتحە و سوڕەتی دوای فاتحە، و ئنجا رکوع، و هەڵسانەوە لە رکوع، و ئنجا چوونە سوجدە.
یانی: لەو دوو ڕەکعەتەدا چوار رکوع، و چوار سوجدە هەن.
هەر کەسیش بە رکوعی یەکەمی ڕەکعەتێک ڕانەگات، ئەو ڕەکعەتە لەکیس چووە و دوای سەلامی ئیمام هەڵدەستێت نوێژەکەی تەواو دەکات.
٢ـ ئیمام لە فاتحە و سوڕەتی دوای فاتحەدا دەنگ بەرزدەکاتەوە.
٣ـ سوننەتە نوێژەکە قوڕئانی زۆری تێدا بخوێندرێت، و درێژکردنەوەی رکوع و سوجدەکانیش سوننەتن.

دوای تەواوبوونی نوێژەکە دوو وتاری وەکو وتاری جومعە دەدرێت، و زۆر زیکر و دوعای تێدا دەکرێت.