ရန်ကုန်မြို့တွင်းရှိ ပျံကျဈေးများ လမ်းဘေးဈေးသည်များကို အောက်တိုဘာ ၁၁ ရက်နေ့မှ စ၍ စကမ စည်ပင်က လိုက်လံဖျက်သိမ်းခိုင်းနေကြောင်း သိရှိရသည်။

အိမ်နှင့်ဆိုင်တွဲထားသည့် ဆိုင်များနှင့် တိုက်မြေညီထပ်တွင် ဖွင့်ထားသည့်ဆိုင်ခန်းများကိုလည်း အဖီများ ဖျက်ချခိုင်းပြီး ကားလမ်းနှင့်မလွတ်ပါက ဖျက်သိမ်းခိုင်းသည်။

ကမာရွတ်မြို့နယ် လှည်းတန်းတဝိုက်ရှိ လမ်းဘေးဈေးဆိုင်များ၊ သင်္ဃန်းကျွန်းမြို့နယ် ပြည်ထောင်စုကုန်းကျော်တံတားအဆင်းရှိ ပျံကျဈေးဆိုင်များ၊ တာမွေမြို့နယ် အာသောကဘက်တဝိုက်နှင့် တာမွေဈေးတဝိုက်ရှိ ဈေးဆိုင်ခန်းများ၊ မင်္ဂလာတောင်ညွန့်မြို့နယ် ကန်တော်လေးညဈေးတလျှောက် ဆိုင်ခန်းများ၊ မှော်ဘီ-ထောက်ကြန့်လမ်းတလျှောက်ရှိ ဈေးဆိုင်များ စသည်တို့ကို လိုက်ဖျက်ခိုင်းခဲ့ကြောင်း သိရှိရသည်။

အကြမ်းဖက်စစ်ခေါင်းဆောင် မင်းအောင်လှိုင် အောက်တိုဘာလ ၁၀ ရက်နေ့တွင် ရန်ကုန်မြို့ထဲ လှည့်ပတ်သွားလာစဉ် လမ်းဘေးဈေးသည်များ၊ ဈေးဆိုင်ခန်းများကို တွေ့၍ မြို့အလှအပပျက်စေသည်ဟု ဆိုပြီး 'နောက်တခါ သူလာသည့်အခါ မမြင်ချင်ဘူး' ဟုဆိုကာ ပြောသွားသောကြောင့် အသည်းအသန် လိုက်လံဖျက်သိမ်းနေခြင်းဖြစ်ကြောင်းလည်း သိရသည်။

မြန်မာနိုင်ငံမှ ပြန်လည်ထွက်ခွာရန် ပြင်ဆင်နေသည့် အွန်လိုင်းဆယ်လီ သမီးဆိုး (ခ) သက်ကိုကို ကို ရန်ကုန်၊ မင်္ဂလာဒုံလေဆိပ်၌ အောက်တိုဘာလ ၁၂ ရက်နေ့တွင် ဖမ်းဆီးပြီးနောက် အမှုတပ်ရာတွင် ၅၀၅ (က) ပါ တပ်လိုက်ကြောင်း စစ်ကော်မရှင်က ထုတ်ပြန်ကြေညာထားသည်။

ကနဦးတွင် ဆက်သွယ်ရေးပုဒ်မ ၆၆ (ဃ) ဖြင့်သာ အမှုဖွင့်ထားကြောင်း ဆိုထားသော်လည်း ယခု နိုင်ငံတော်အကြည်ညိုပျက်စေမှုပုဒ်မ ဆိုသည့် ၅၀၅ (က) ပါ ထပ်တပ်လိုက်ခြင်းဖြစ်သည်။

အကြမ်းဖက် စစ်ခေါင်းဆောင် မင်းအောင်လှိုင်၊ ကြူကြူလှ နှင့် စစ်တပ်အရာရှိများကို ပုတ်ခတ်ပြောဆိုလို့ဟု သိရသည်။

သမီးဆိုးသည် လူသိများသည့် အနုပညာရှင်များ၏ အတွင်းရေးများကို ဖော်ထုတ်ပြောဆိုရင်း အွန်လိုင်းဆယ်လီဖြစ်လာခဲ့သူဟု ဆိုကြပြီး အမေရိကန်နိုင်ငံသား ခံယူထားကြောင်းလည်း သိရသည်။

အကြမ်းဖက်စစ်ခေါင်းဆောင် မင်းအောင်လှိုင် ယခုရက်ပိုင်းထဲ ရန်ကုန်မြို့သို့ ရောက်လာဖို့ ရှိပုံရသည်။

မင်းအောင်လှိုင် စီးနေကျ Fokker-70 လေယာဉ် ယနေ့ ညနေ ၄ နာရီခွဲခန့်တွင် မင်္ဂလာဒုံလေတပ်စခန်းသို့ ဆင်းသက်ထားသည်။

အောက်တိုဘာလ ၂၀ ရက်နေ့တွင် ဒဂုံမြို့နယ်၊ အမျိုးသားဇာတ်ရုံ၌ ဒီပါဝလီပွဲ လုပ်ဖို့ ရှိပြီး အဆိုပါပွဲသို့ မင်းအောင်လှိုင် တက်ဖို့ ရှိနိုင်သည်။

၎င်းအမျိုးသားဇာတ်ရုံဝန်းကျင်နှင့် အနီးရှိ မင်းမနိုင်အိမ်ရာဝန်းတဝိုက်တွင်လည်း ယမန်နေ့ အောက်တိုဘာ ၁၆ ရက်နေ့ကတည်းက အကြမ်းဖက်တပ်သား အများအပြား လုံခြုံရေးချထားသည်။

ယနေ့ တနေကုန်နီးပါး ရန်ကုန်မြို့ ကားလမ်းမများပေါ် စကမ ရာထူးကြီးယာဉ်တန်း သွားလာမှုများလည်း ပုံမှန်ထက် အလွန်များပြားသည်။