tgoop.com/mzravilka/7613
Last Update:
#لانەواز
هۆنەی ژمارە بیستوپێنج L42
وەکوو مەجنوون بە دووی لەیلا، جێگام کێوانە تا مردن
لەگەڵ وەحشی بیـابانا ئەژیم شێتانە تا مردن
گوڵ و گوڵزارە باخی عەشق، بە تۆ چی زاهیدی خوێڕی!
هەموو هەر سەرو و نەسرین و گوڵ و ڕەیحانە تا مردن
بە شانە زوڵفی داهێنا، بە ڕووی ڕۆژا شەوی هێنا
تەمی کێشا بە سەر دڵدا، تەڵی ئەو شانە تا مردن
برۆی لایێ جگەر ئەبڕێ، بە موژگان دڵ ئەکا کونکون
ئیتر عاشق ئەبێ چبکا، دەوای گریانە😭 تا مردن
بڕۆ سۆفی بە مردن چی! ڕیات بۆ نان و دوو نانە
ویسالی جان و جانانە، هیوای ڕەندانە تا مردن
بە عیشوە و نازەوە ئەو دڵبەرە گەر بێت و خۆی دەرخا
سەر و پێی عاشقە و ئەڕوا، فیدای جانانە تا مردن
لە دووریی سەروی باڵای یار، وەکوو قومری ئەناڵێنم
ئیتر وێردی زمانە "یا کەریم" ڕەندانە تا مردن
لە سایەی عەشقی تۆوە بوتپەرستیی بۆتە پیشەی من
لەگەڵ پیری موغان ئیتر من و مەیخانە تا مردن
وتم: وا کەوتە پێی عەشقت، دەس و پێمی ڕزان، تا کەی
وتی: شێتی بەرت نادەم ئەوە جێتانە تا مردن!
وەرە #فەوزی لەمەولا ڕووی دڵت دایم لە مەولا بێ
لە بەر قاپی ئەوا سەر دابنێ مەردانە تا مردن.
#ئەحمەد_شێخغەنی( #فەوزی 1958/2/9 _ 1890)
مامی شاعیری بەناوبانگ #شێخنووری_شێخساڵحە.( 1958/12/2ـ 1896)
📝 ئەم هۆنەرە دەگەڵ #ئەحمەد_فەوزی مامۆستای هێمن_موکریانی ناو و نازناوی یەکێکە بەڵام دوو کەسی جودان.
سەرچاوە: دیوانی شاعیر
نووسینەوە و ناردن: لانەواز
@mzravilka
BY مزراویلکە
Share with your friend now:
tgoop.com/mzravilka/7613