tgoop.com/islomnuricom/3983
Last Update:
#СаволЖавоб
Витр намози суннатга мувофиқ қандай ўқилади?
Савол:
Витр намози қандай ўқилса суннатга мувофиқ бўлади? Шу ҳақда тўлиқ маълумот берсангиз.
Жавоб:
Аллоҳ таолога ҳамду санолар, Расулуллоҳга салавоту саломлар бўлсин.
Витр намозини 1, 3, 5, 7, 9 ёхуд 11 ракаат ўқиш суннатга мувофиқдир.
Уни 3 ракаат ўқимоқчи бўлсангиз, икки кўриниши бор:
1. Аввал икки ракаат ўқийсиз ва салом берасиз. Кeйин туриб, бир ракаат витрга ният қиласиз. Рукудан аввал ё кeйин қунут дуосини ўқийсиз, ташаҳҳуд ва салавотларни ўқигандан сўнг салом бeриб, намозни тугатасиз. Шунда уч ракаатни иккига бўлиб икки ташаҳҳуд ва икки салом билан ўқиган бўласиз (2+1=3).
2. Уч ракаат витрга (дилингизда) ният қиласиз, иккинчи ракаат саждаларидан кeйин ташаҳҳудга ўтирмай қиёмга туриб кeтасиз, учинчи ракаат рукусидан кeйин (ёки аввал) қунут дуосини ўқийсиз. Икки саждадан кeйин ўтириб, ташаҳҳуд, салавотлар ва дуони ўқиб, салом бeрасиз. Шунда бир ташаҳҳуд ва бир салом билан уч ракаат ўқиган бўласиз. Ҳар икки кўринишда 1-ракаатга «Аъло», 2-ракаатга «Кофирун», 3-ракаатга «Ихлос» сураларини ўқисангиз яхши, бу амал суннатда келган. Булардан бошқа сураларни ўқиш ҳам жоиз.
Аммо уч ракаатли витрни шом намозига ўхшатиб, икки ташаҳҳуд билан ўқишингиз суннатга хилоф, Расулуллоҳ соллаллоҳу алайҳи ва саллам бундан қайтарганлар. Абу Ҳурайра розияллоҳу анҳу ривоят қилади, Пайғамбар соллаллоҳу алайҳи ва саллам дедилар: «Витрни шом намозига ўхшатиб уч ракаат ўқиманглар, балки беш ёки етти ракаат қилиб ўқинглар». Бу ҳадисни Ибн Ҳиббон (2429), Ҳоким (1138), Байҳақий (4878) ва бошқалар ривоят қилган, Ҳофиз Ибн Ҳажар «Фатҳул Борий» китобида (2/558): «Бухорий ва Муслим шартига кўра саҳиҳ ҳадис», деган.
Витрни 5, 7 ёки 9 ракаат қилиб, бир салом билан ўқисангиз ҳам бўлади. 9 ракаат қилганингизда 8-ракаатдан кейин ташаҳҳудга ўтириб, «Аттаҳиёт»ни ўқийсиз, кейин «Аллоҳу акбар» деб 9-ракаатга туриб, уни юқорида айтилган учинчи ракаат каби тамомлайсиз. Ойша розияллоҳу анҳо айтади: «Набий соллаллоҳу алайҳи ва саллам 9 ракаат ўқир, буларнинг фақат саккизинчисида ўтирар, Аллоҳни зикр қилар, ҳамд айтар, дуо қилар, сўнгра салом бермай ўринларидан турар ва тўққизинчи ракаатни ўқир эдилар. Сўнг ўтирар, Аллоҳни зикр қилар, ҳамд айтар, дуо қилар, кейин бизга эшиттириб салом берар эдилар» (Муслим ривояти, 737-ҳадис).
Беш ва етти ракаат ўқисангиз, охирида бир ташаҳҳуд билан якунлайсиз. Умму Салама розияллоҳу анҳо айтади: «Набий соллаллоҳу алайҳи ва саллам витрни беш ва етти ракаат ўқир, улар орасини на салом ва на калом билан бўлар эдилар» (Насоий (1714), Ибн Можа (1192), Аҳмад (26529) ва бошқалар ривояи. Саҳиҳ ҳадис).
11 ракаат ўқимоқчи бўлсангиз, икки-икки ракаатдан ўқиб, охирида ёлғиз бир ракаат билан тугатасиз. Расулуллоҳ соллаллоҳу алайҳи ва саллам дедилар: «Тунги намоз икки-икки ракаатдандир. Бирортангиз субҳ кириб қолишидан қўрқса, бир ракаат ўқисин. Бу ўқиган намозларини тоқ қилиб қўяди» (Бухорий (993) ва Муслим (749) ривояти).
Витрни фақат бир ракаат ўқисангиз ҳам бўлади. Лекин ундан аввал камида 2 ракаат ўқисангиз яхши. Расулуллоҳ соллаллоҳу алайҳи ва саллам дедилар: «Витр кечанинг охирида ўқиладиган бир ракаатдир» (Муслим ривояти, 752-ҳадис). Валлоҳу аълам.
Аллоҳ таоло барчамизни Қуръон ва Суннатга амал қилувчилардан қилсин, омин!
https://www.tgoop.com/islomnuricom
BY Islom Nuri
Share with your friend now:
tgoop.com/islomnuricom/3983