tgoop.com/islomnuricom/3979
Last Update:
#Тафсири_муяссар
سورة فصلت
41. Фуссилат сураси, 13-18 оятлар
فَإِنۡ أَعۡرَضُواْ فَقُلۡ أَنذَرۡتُكُمۡ صَٰعِقَةٗ مِّثۡلَ صَٰعِقَةِ عَادٖ وَثَمُودَ ﴿١٣﴾
13. Ўша инкорчилар Қуръоннинг мақтовли васфлари ва буюк Аллоҳнинг сифатлари уларга баён қилингандан кейин ҳам юз ўгирсалар, сиз уларга: «Мен сизларни Од ва Самуд қабилалари Парвардигорларига кофир бўлган ва Унинг элчиларига итоатсизлик қилган пайтда уларнинг бошига келган азоб каби сизларни йўқ қилиб юборадиган азобдан огоҳлантирдим», деб айтинг.
إِذۡ جَآءَتۡهُمُ ٱلرُّسُلُ مِنۢ بَيۡنِ أَيۡدِيهِمۡ وَمِنۡ خَلۡفِهِمۡ أَلَّا تَعۡبُدُوٓاْ إِلَّا ٱللَّهَۖ قَالُواْ لَوۡ شَآءَ رَبُّنَا لَأَنزَلَ مَلَٰٓئِكَةٗ فَإِنَّا بِمَآ أُرۡسِلۡتُم بِهِۦ كَٰفِرُونَ ﴿١٤﴾
14. Пайғамбарлар Од ва Самуд қабилаларига кетма-кет келиб, уларни ягона ва шериги бўлмаган Аллоҳга ибодат қилишга буюрганларида улар: «Агар Раббимиз Уни ягона илоҳ деб эътиқод қилишимизни ва Ундан бошқасига ибодат қилмаслигимизни истаганида, бизга сизлар қилаётган даъватни қилиши учун осмондан фаришталарни элчи қилиб туширган бўлар эди, сизларни эмас. Чунки сизлар биз каби оддий инсонсиз. Биз сизлар келтирган ақидани – ягона Аллоҳга иймон келтиришни қабул қилмаймиз», деб айтдилар.
فَأَمَّا عَادٞ فَٱسۡتَكۡبَرُواْ فِي ٱلۡأَرۡضِ بِغَيۡرِ ٱلۡحَقِّ وَقَالُواْ مَنۡ أَشَدُّ مِنَّا قُوَّةًۖ أَوَلَمۡ يَرَوۡاْ أَنَّ ٱللَّهَ ٱلَّذِي خَلَقَهُمۡ هُوَ أَشَدُّ مِنۡهُمۡ قُوَّةٗۖ وَكَانُواْ بِـَٔايَٰتِنَا يَجۡحَدُونَ ﴿١٥﴾
15. Ҳуд пайғамбарнинг қавми Од қабиласига келсак, улар ер юзида бандаларга ноҳақ кибр қилдилар ва манманлик билан: «Биздан кўра кучлироқ ким бор?!» деб айтдилар. Ахир улар ўзларини яратган Аллоҳ улардан кучлироқ ва қудратлироқ эканини кўрмадиларми?! Улар Бизнинг далилларимизни инкор қилар эдилар.
فَأَرۡسَلۡنَا عَلَيۡهِمۡ رِيحٗا صَرۡصَرٗا فِيٓ أَيَّامٖ نَّحِسَاتٖ لِّنُذِيقَهُمۡ عَذَابَ ٱلۡخِزۡيِ فِي ٱلۡحَيَوٰةِ ٱلدُّنۡيَاۖ وَلَعَذَابُ ٱلۡأٓخِرَةِ أَخۡزَىٰۖ وَهُمۡ لَا يُنصَرُونَ ﴿١٦﴾
16. Биз уларга шу дунёнинг ўзидаёқ хорловчи азобни тоттириш учун машъум кунларда ўта совуқ ва даҳшатли бўронни юбордик. Қасамки, охиратдаги азоб бундан-да хорловчироқ, бундан-да ёмонроқ. Улар ўзларини азобдан қутқариб оладиган бирон ёрдамчини тополмайдилар.
وَأَمَّا ثَمُودُ فَهَدَيۡنَٰهُمۡ فَٱسۡتَحَبُّواْ ٱلۡعَمَىٰ عَلَى ٱلۡهُدَىٰ فَأَخَذَتۡهُمۡ صَٰعِقَةُ ٱلۡعَذَابِ ٱلۡهُونِ بِمَا كَانُواْ يَكۡسِبُونَ ﴿١٧﴾
17. Солиҳнинг қавми Самудга келсак, Биз уларга ҳақиқат ва ҳидоят йўлини баён қилдик. Улар ҳидоят ўрнига залолатни танладилар. Шундан сўнг Аллоҳга кофир бўлиш ва Унинг пайғамбарларини ёлғончи қилишдек гуноҳлари боис уларни хорловчи азоб чақмоғи уриб, ҳалок қилди.
وَنَجَّيۡنَا ٱلَّذِينَ ءَامَنُواْ وَكَانُواْ يَتَّقُونَ ﴿١٨﴾
18. Биз иймон келтирганларни Од ва Самуд қабилаларига тушган азобдан қутқардик. Азобдан қутулган кишилар Аллоҳдан қўрқар ва Ундан тақво қилар эдилар.
https://www.tgoop.com/islomnuricom
BY Islom Nuri
Share with your friend now:
tgoop.com/islomnuricom/3979