tgoop.com/islomnuricom/3870
Last Update:
#Тафсири_муяссар
سورة الشورى
42. Шўро сураси, 1-10 оятлар
﴿ بِسْمِ اللّهِ الرَّحْمَنِ الرَّحِيمِ ﴾
حمٓ ﴿١﴾ عٓسٓقٓ ﴿٢﴾
1, 2. Ҳа, мим. Айн, син, қоф. “Ҳуруфи муқаттаот” деб номланган бу ҳарфлар ҳақида Бақара сураси аввалида айтиб ўтилган.
كَذَٰلِكَ يُوحِيٓ إِلَيۡكَ وَإِلَى ٱلَّذِينَ مِن قَبۡلِكَ ٱللَّهُ ٱلۡعَزِيزُ ٱلۡحَكِيمُ ﴿٣﴾
3. Эй Пайғамбар, Аллоҳ сизга бу Қуръонни туширганидек сиздан олдинги пайғамбарларга ҳам китоблар ва саҳифалар туширган. У интиқом олишида ўта қудратли, сўзлари ва ишларида ҳикматли зотдир.
لَهُۥ مَا فِي ٱلسَّمَٰوَٰتِ وَمَا فِي ٱلۡأَرۡضِۖ وَهُوَ ٱلۡعَلِيُّ ٱلۡعَظِيمُ ﴿٤﴾
4. Еру осмонлардаги барча нарса ёлғиз Аллоҳникидир. У зотида, қадр-қийматида ва ҳукмронлигида энг олий, энг улуғ ва энг буюк зотдир.
تَكَادُ ٱلسَّمَٰوَٰتُ يَتَفَطَّرۡنَ مِن فَوۡقِهِنَّۚ وَٱلۡمَلَٰٓئِكَةُ يُسَبِّحُونَ بِحَمۡدِ رَبِّهِمۡ وَيَسۡتَغۡفِرُونَ لِمَن فِي ٱلۡأَرۡضِۗ أَلَآ إِنَّ ٱللَّهَ هُوَ ٱلۡغَفُورُ ٱلرَّحِيمُ ﴿٥﴾
5. Устма-уст жойлашган осмонларнинг ҳар бири Раҳмоннинг улуғлиги ва буюклигидан ёрилиб кетай дейди. Фаришталар Парвардигорларига ҳамду санолар билан тасбеҳ айтадилар, Уни барча нолойиқ айбу нуқсондан поклайдилар, Парвардигорларидан ер юзидаги иймон аҳлининг гуноҳларини кечиришини сўрайдилар. Билингларки, Аллоҳ мўмин бандаларининг гуноҳларини кечирувчи ва уларга раҳм қилувчи зотдир.
وَٱلَّذِينَ ٱتَّخَذُواْ مِن دُونِهِۦٓ أَوۡلِيَآءَ ٱللَّهُ حَفِيظٌ عَلَيۡهِمۡ وَمَآ أَنتَ عَلَيۡهِم بِوَكِيلٖ ﴿٦﴾
6. Аллоҳдан бошқаларни худо қилиб, уларни ўзларига дўст тутаётган ва уларга ибодат қилаётган кимсаларга келсак, Аллоҳ таоло қиёмат куни муносиб жазо бериш учун уларнинг барча қилмишларини сақлаб қўяди. Эй Расул, сиз уларнинг амалларини сақлашга вакил қилинган эмассиз. Сиз огоҳлантирувчисиз холос. Сизнинг вазифангиз етказиш, ҳисоб-китоб эса Бизнинг зиммамиздадир.
وَكَذَٰلِكَ أَوۡحَيۡنَآ إِلَيۡكَ قُرۡءَانًا عَرَبِيّٗا لِّتُنذِرَ أُمَّ ٱلۡقُرَىٰ وَمَنۡ حَوۡلَهَا وَتُنذِرَ يَوۡمَ ٱلۡجَمۡعِ لَا رَيۡبَ فِيهِۚ فَرِيقٞ فِي ٱلۡجَنَّةِ وَفَرِيقٞ فِي ٱلسَّعِيرِ ﴿٧﴾
7. Сиздан олдинги пайғамбарларга ваҳий қилганимиздек, сиз маккаликларни ва Макка атрофида яшовчиларни шак-шубҳасиз бўладиган жамланиш куни – қиёмат кунининг азобидан огоҳлантиришингиз учун сизга бу арабий Қуръонни ваҳий қилдик. У куни одамлар икки гуруҳга бўлинади. Бир гуруҳи жаннатда бўлиб, улар Аллоҳга иймон келтирган, пайғамбари Муҳаммад саллаллоҳу алайҳи ва саллам олиб келган шариатга эргашган одамлардир. Иккинчи гуруҳи ловуллаб турган дўзахда бўлади. Улар Аллоҳга кофир бўлган, пайғамбари Муҳаммад саллаллоҳу алайҳи ва саллам келтирган динга мухолиф бўлган кимсалардир.
وَلَوۡ شَآءَ ٱللَّهُ لَجَعَلَهُمۡ أُمَّةٗ وَٰحِدَةٗ وَلَٰكِن يُدۡخِلُ مَن يَشَآءُ فِي رَحۡمَتِهِۦۚ وَٱلظَّٰلِمُونَ مَا لَهُم مِّن وَلِيّٖ وَلَا نَصِيرٍ ﴿٨﴾
8. Аллоҳ истаса, барча бандаларини ҳидоятда жамлаган ва ҳаммасини бир динда қилган бўлар эди. Лекин У ўзи истаган хос бандаларини раҳматига дохил қилишни истади. Ширк келтириб, ўзларига зулм қилганлар учун қиёмат куни уларга ён босадиган бирор дўст ва уларни Аллоҳнинг азобидан қутқарадиган бирор ёрдамчи бўлмайди.
أَمِ ٱتَّخَذُواْ مِن دُونِهِۦٓ أَوۡلِيَآءَۖ فَٱللَّهُ هُوَ ٱلۡوَلِيُّ وَهُوَ يُحۡيِ ٱلۡمَوۡتَىٰ وَهُوَ عَلَىٰ كُلِّ شَيۡءٖ قَدِيرٞ ﴿٩﴾
9. Ёки ўша мушриклар Аллоҳдан ўзгаларни дўст тутдиларми?! Аллоҳнинг ёлғиз ўзи дўстдир. Бандаси тоат-ибодат билан Уни дўст тутади. У мўмин бандаларини дўст тутиб, уларни зулматлардан нурга чиқаради ва барча ишларида уларга ёрдам беради. У ўликларга жон бахш этиб, уларни қайта тирилтиради. У ҳар ишга қодир, Уни ҳеч нарса ожиз қолдира олмайди.
وَمَا ٱخۡتَلَفۡتُمۡ فِيهِ مِن شَيۡءٖ فَحُكۡمُهُۥٓ إِلَى ٱللَّهِۚ ذَٰلِكُمُ ٱللَّهُ رَبِّي عَلَيۡهِ تَوَكَّلۡتُ وَإِلَيۡهِ أُنِيبُ ﴿١٠﴾
10. Эй одамлар, сизлар қай бир диний масалада ихтилоф қилманг, албатта унинг ҳукми Аллоҳга – Унинг китобига ва пайғамбарининг суннатига ҳавола этилади. Ана шу Аллоҳ менинг ва сизларнинг Раббимиздир. Мен барча ишларимда ёлғиз Унга таваккал қиламан ва фақат Унга юзланаман.
https://www.tgoop.com/islomnuricom
BY Islom Nuri
Share with your friend now:
tgoop.com/islomnuricom/3870