tgoop.com/huzurkitoblari/1305
Last Update:
“Shifokor sifatida bemorlik nimaligi haqida muayyan tasavvurga ega boʻlishingiz mumkin, ammo uni oʻzingiz boshdan kechirmaguningizcha aniq bilish imkonsiz. Oshiqlik yoki farzandli boʻlish kabi, buni faqat boshidan kechirgan odamgina bila oladi”
Pol Kalaniti – Soʻnggi nafas havoga qorishmasdan
Pol Kalaniti yosh, umidli neyrojarroh edi, oldinda uni muvaffaqiyatli karyera kutayotgandi. Ammo unga oʻpka saratoni tashxisi qoʻyilganidan keyin butun hayoti, maqsadlari ostin-ustun boʻlib ketadi…
Kitobda muallif oʻzining adabiyotga muhabbati, meditsinaga qanday kirib kelgani, kasbiy mashaqqatlari, kasalligi haqida qanday xabar topgani, qanday kurashgani, umrining soʻnggi kunlari haqida hikoya qilib beradi. Hayot va oʻlimning mohiyatini tushunishga urinib, neyrojarrohlikni tanlagan Pol oʻzi oʻlim bilan yuzma-yuz kelgandagina uning haqiqiy ma’nosini anglab yetadi. Oʻzi bemorlarga tashxis qoʻygan, ularni umidlantirgan yoki bor umidini yoʻqqa chiqargan kabinetda bemor sifatida oʻtirib, saraton tashxisini eshitishi ayniqsa ogʻir ta’sir qiladi.
Oʻzi biografik kitoblarga baho berishga qiynalaman. Kimningdir yashagan/yashayotgan hayotini muhokama qilishdek tuyuladi menga. Oʻlim ostonasida turib yozilgan kitobga fikr bildirish esa karrasiga ogʻirroq boʻlar ekan.
Bu insonning hayoti bilan tanishganimdan xursandman. Uning bosib oʻtgan yoʻli menga koʻp narsani oʻrgatdi. Eng qiyin davrda ham umidini yoʻqotmasligi, sinovlarga mardonavor turishi, iroda kuchidan hayratga tushgan boʻlsam, ogʻir xasta boʻla turib ishini davom ettirishga oʻzida kuch topishiga tan berdim. Garchi asar oʻlim haqida boʻlsa-da, oʻquvchining hayotga boʻlgan muhabbatini oshiradi. Maqsad tomon harakat qilishga kuch beradi.
Kitobda menga eng yoqqan qismi rafiqasi tomonidan yozilgan soʻngsoʻz boʻldi. Oʻzi butun kitob davomida rafiqasi nimalarni his qilayotgani, shuncha sinovga qanday dosh berganini bilgim kelgandi. Kitobga yozgan soʻngsoʻzi bu savollarimga javob berdi, asar uchun ham ajoyib yakun boʻlgan (bunday yakun uchun ajoyib degan soʻz uncha yarashmadi, bilaman). Rafiqasining kechinmalari, uning nigohi orqali Polning soʻnggi kunlariga nazar solish emotsional jihatdan asarning kulminatsion nuqtasi boʻlgan.
Fikrim oxirida oʻlim va hayot haqida falsafa soʻqmoqchi edim, ammo nima demoqchi ekanimni shundoq ham hamma yaxshi bilib turibdi degan oʻyda bu fikrimdan qaytdim. Yaxshisi kitobni oʻqib, aytmoqchi boʻlganlarimni oʻzingiz his qiling. Tavsiya qilaman.
#review
BY Huzur kitoblari
Share with your friend now:
tgoop.com/huzurkitoblari/1305