tgoop.com/hsan12/1337
Last Update:
لفاركله زين بهل لوكت كسره جبيره
شلون لو اذا الكمر اكبر مثل للغيره
كلبه نكسر يالهل ناس بفراك اخيه العباس
شيخ العشيره شيخ العشيره
••••
الدنيا ما بيها طعم يل فاركت خوانك
احذر اذا جار الوكت ضليت محد عانك
الزين بالشده درع سيفه بوسط ذرعانك
عباس فاركني الامل هجمو علي عدوانك
واتشمتو يا عيناي ضهري نكسر يارجواي
من شافه مكطوع الراس بفاراك اخيه العباس
بعيني البصيره شيخ العشيره
•••••
هوه الاخو من ينفكد معناها فاكد روحك
تبقى بحزن طول دهر مابطلت من نوحك
عدنا لحسين اكبر مثل يمه قليله اجروحك
وعباس من طب النهر يا زلمه يلي يلوحك
ضلمه اصبحت كل دنياي اتفكر الرايح جاي
راح الامل والفه الياس بفراك اخيه العباس
ضايك زفيره شيخ العشيره
•••••
ليلي اخلصه بالدمع وانهاري ضلمه اعليه
و عاتبت عباس الكمر من سلبو الترجيه
شلون لو زينب مشت فوك الهزل مسبيه
لو صبر ايوب امتلك ذرت صبر ما بيه
اصبر وخوتي مطاعين بنص الخيم بس ونين
جان اعله زينب حراس بفراك اخيه العباس
حيره ويه حيره شيخ العشيره
•••••
حسين كلبه مو حجر من شاف اخيه كباله
ماعنده حيله ولا كدر يرجع لخويه وشاله
و من كله يا خويه ضعن زينب منو كفاله
يتلوه مكسور الضهر من هجمت الخياله
تهجم عليه الصوبين الحيله قلت بحسين
حيره وفقد ماينقاس بفراك اخيه العباس
شنهي مصيره شيخ العشيره
•••••
يطبك سماها عل ارض من حركته لبجبده
والجان طحتاطه الزلم هسه يقاتل وحده
والجان باخوان و كمر واليوم محد سنده
يمكن يهل و ادم كرب لحسين يوم وعده
وي الدمع صب ادموم حسين اصبح مهموم
اتصورها زين باحساس بفراك اخيه العباس
وعينه بصيره شيخ العشيره
•••••
يراد يا عالم درس حت انعرف الموضوعه
شلون من زينب بقت بخيمتها يل مفجوعه
شافت اجفوف العباس والخيل فوك ضلوعه
وحسين كل جسمه نبل وتصور انته الوعه
زينب جبل لا اكبر من تمشي ما تتعثر
بت الفحل رفعت راس بفراك اخيه العباس
ادموعه غزيره شيخ العشيره
••••••••••••
حسن صالح العيساوي
BY قصائد الشاعر حسن العيساوي
Share with your friend now:
tgoop.com/hsan12/1337