Орада саёҳат форумлари орқали Пўлатхонга борганларни кузатиб турдим. Кўпчилик Белдерсой – Чет-Қумбел – Тахта довони – Жар чўққиси – Қораунгур чўққиси – Пўлатхон йўналишини ёки Белдерсой – Нурекота – Мирзабой – Минжилқи – Қораунгур – Пўлатхон маршрутини танларди. Бу маршрутларда платогача масофа 40-45 километрни ташкил этади, қайтиш билан 80-90 километр. Бунга камида 3-4 кун сарф қилинади.

“Lider Hikers” саёҳат гуруҳи етакчиси Аббос икки кунда бориб-қайтганини кўриб, унда маслаҳат сўрадим. Барака топсин, қаерда тўхташ мумкин, қаерда сув бор, ҳамма маълумотларни берди. Саёҳатсевар дўстлар билан сафарга тайёргарликни бошладик. Масофа – 24 километр. Кўтарилиш – 1400 метр. Палатка, ётоққоп, ичимлик суви, қўшимча иссиқ кийимлар, егуликлар каби барча юкларни елкада кўтариб борамиз. Шу боис йигитларга юкни 15 килограммдан оширмасликни тайинладим.