tgoop.com/yalytanigadamtlhyati/1308
Last Update:
الكراش ..
صُورة الكراش الـ رفعها الليلة في الفيسبوك درعة
"نار وشرار"
وااي يا بنات من الكراش ..
أنا عندي ألبوم في تلفوني كامل بس فاتح قُصَاد صُوَرو هو!
أثناء مرورنا على التايم لاين
كم مرة وقفنا في صورة زول .. شغالين عليها زوم وبنتأمَّل في جمالو!
كم مرة؟
كم مرة حضرنا مُسلسل أو فيلم
عشان البطل .. "قاطِع"!
كم مرة..
كنا بنحضر محاضرة لي مادة ما بنحبها أساسًا
بس عشان الأستاذ "نار الضلع"
ونفس الكلام ده بالنسبة للشباب قُصَاد البنات برضو!
مواقِع التواصل
عبارة عن مسرح ما فيهو سِتار
بيت بدون سور!
كل شخص.. من حقو يشوف أي شي
الحاجة دي
بدون ما نشعُر .. خلَّتنا ما عندنا تحَفُّظ تجاه كلماتنا /نظراتنا وغيرو!
زمان
لما أكون الصباح طالعة على الجامعة
أبوي قبل ما يوَصّيني بالأذكار .. كان بقول لي
يا صفِيَّة..
"اخفضي بصرك .. اخفضي صوتك"!
بس مع الزمن
الوضع اختلف..!
السوشيال ميديا بِقَت بتتيح لينا كل شي وبدون حساب!
ناسيين أو متناسيين قول ربنا عز وجل،،
"قُل لِلمُؤمِنينَ يَغُضّوا مِن أَبصارِهِم وَيَحفَظوا فُروجَهُم ذلِكَ أَزكى لَهُم إِنَّ اللَّهَ خَبيرٌ بِما يَصنَعونَوَقُل لِلمُؤمِناتِ يَغضُضنَ مِن أَبصارِهِنَّ وَيَحفَظنَ فُروجَهُنَّ وَلا يُبدينَ زينَتَهُنَّ إِلّا ما ظَهَرَ مِنها وَليَضرِبنَ بِخُمُرِهِنَّ عَلى جُيوبِهِنَّ وَلا يُبدينَ زينَتَهُنَّ "
فكرة غض البصر
أكيد ما من فراغ ..
عايني لقلبِك ..
عايَنتِ.. ؟
كم مرة حسيتي إنو متضايق بدون سبب واضح
كم مرة كنتِ حاسة إنو اشمعنا فلان ده يحب فلانة دي وما أنا
طيب كم مرة حسيتي إنك ما راضية بالشخص اللي اتقدم ليك.. بس عشان شكلو ما مقبول بالنسبة ليكِ
رغم إنو ما فيهو كلمة
بس لأنك رافعة الاستاندر حقك .. دي الحاجة الانتي بتقوليها كـ تبرير ليك ولي غيرك
بس الحقيقة
إنو نحنَ سارحين بي خيالنا ومطلقين بصرنا تجاه أي زول وبي أي شكل وبالساعات
فبقى ماف زول مالي عيننا وقلبنا
إطلاق البصر
عندو عواقب كتيرة قد ما ننتَبه ليها
أو بنشوفها لكن بنعمل رايحين!
كتيرة .. واللي ذكرتها فوق دي من أبسطها والله!
وبالمُقَابِل..
النبي ﷺ
قال عن ربنا سبحانه وتعالى في الحديث القدسي :
"النظرة
سهمٌ مسمومٌ من سِهامِ إبليس، من تركها لأجلِ مخافتي
أبدلتهُ إيمانًا يَجِدُ حلاوَتهُ في قلبِهِ"
ماف شي بعادل
شعور إنك تكوني مُطمَئِنَّة
إنو زي ما حفظتي بصرك وغضّيتي طَرفِك
ربنا ح يبدلك
إيمان ويقين .. ح يبدلك بشخص يستاهلك ويستاهل حفظك لي قلبك
ويصونك ويصونه زي ما انتِ كُنتِ بتعملي وأكتر
عند ربنا
ماف شي بضيع..
فشنو رايك؟
نبدا عهد جديد ..
نتجاوز عن الفات .. نسأل ربنا المغفرة وجنة عرضها السموات والأرض
ونسألو الهدى والتُّقى والعفاف والغِنى
شنو رايك؟
نحفظ قلبنا .. ما حاسة إنو مرمَطناهو كتير؟
شنو رايك؟؟
خِتامًا ..
يا الله
كل بِت عايزة رضاك
تسَهِّل ليها درب الخير .. وتعينها على قلبها
"ألا فاحرَصِي على قلبِكِ يا فتاة" ♥️
وشُكرًا
وعفوًا
#صفِيّة_مُصطفى
BY يآليتني قدمت لحيآتي❤️
Share with your friend now:
tgoop.com/yalytanigadamtlhyati/1308