tgoop.com/yalytanigadamtlhyati/1259
Last Update:
كان في اتنين في نفس الجامعة بيحبوا بعض شديد ، و كل الناس شايفة حبهم و عارفة قصتهم ..
في ناس شايفينهم كابلز رهيبين و ح يعبروا لقدام و ناس تانيين شايفين الولد بيلعب بيها ساي أو قصتهم ح تفشل في النهاية ..
بس هو طلع صادق و هي طلعت وفية و بعد كفاح مع بعض اتزوجوا فعلاً 😍 و بقوا يحكوا قصتهم و كل الناس فرحانة بيهم و عايشين في سعادة و حب ووو
قصة جميلة صح ؟ ^^
لكنها للأسف ما بتفرق معانا في حاجة 🌚
في الفترة الأخيرة بقينا نشوف السيناريو ده كتير ، و فجأة سبحان الله الأولاد بقوا يوفوا بوعودهم و يكونوا جادين في إرتباطهم و في أمثلة كتيرة من الكابلز في السوشيال ميديا 😄
و طبعاً القصص دي أثرت بشكل كبير على البنات و مشاعرهم و تفكيرهم 😁
فالعايزة أقوله ..
- كونه ( طلع راجل و اتزوجها فعلاً ) على قولكم دي أقل حاجة مفروض تحصل ما معناها إنهم رهيبين ..
- كونه ( طلع راجل و وفى بوعده ) ما معناها الإرتباط من البداية صح و لا القصص الناجحة دي تبقى لينا أمثلة و قدوات و نماذج نقيس عليها 🤦♀️
- كونه ( طلع راجل و قدر كلمته ) و هسي سعيدين مع بعض ما معناها نشجِّع الناس بالقصة دي إنهم لازم يتزوجوا بالحب و الارتباط و الكلام الفارغ ده
- ممكن الإرتباط و القصص دي تكون نهايتها جميلة جداً لكنها تظل ( ما من قيمنا ) و لا بنعترف بيها في ديننا و شريعتنا ❤️
- ممكن ذنوب الإرتباط أو تجاوزات الخطبة ما تأثر فيما بعد على الحياة الزوجية زي ما بقولوا و تكون الحياة بعدين هادئة و جميلة برضو ؛ لكنها تظل ( ذنوب ) ربنا بيحاسبنا على فعلها و نتقرب له تعالى باجتنابها ❤️
- ممكن ( الحلال ) ما يكون أجمل دايماً لكنه يظل ( اختيار الله و ما يرضاه لنا ) ❤️
مئات الناس بتتزوج كل يوم و أسبوع و شهر بس انبهارنا بيكون بالكانوا عايشين قصة قبل الزواج !
أكيد كونهم تزوجوا - و على الأقل ما طلع الموضوع لعب و تقضية وقت - ح ندعي ليهم بالبركة و نتمنى ليهم السعادة ^^ لكن ده ما بيعني نعمل منهم نماذج و نسطرها كقصص نجاح و هم الفرق بينهم و بين بقية الأزواج فقط ( قصة الحب الطويلة قبل الزواج ) و هي أصلاً حاجة حرام يعني 🌚💔
و للأسف انتشار السيناريوهات دي بيأثر بصورة كبيرة على الشباب و البنات بالذات و كل واحدة لما تقرا عنهم أو تشوف صورهم من جواها بتتمنى تعيش قصة زيهم و أنا شايفة الحاجة دي شديد 💔
يا جميلات ❤️ أكيد كل واحدة فينا في خيالها قصة مشابهة هي #الأميرة فيها .. و بتنتظر اليوم الح تجي تحكي فيهو للناس قصتها و تحس إنها ملكت الكون بعداك 🌸
على فكرة ما لازم يكون في #قصة أصلاً 😅
الزواج رزق و الحب رزق و السعادة و الإستقرار في الحياة الزوجية رزق ..
ممكن يتحقق واحد أو اتنين أو التلاتة مع بعض ، بس إحنا في كل الأحوال ما بنطلب الحاجات دي غير من ربنا و ما بنسلك ليهم غير الطريق البرضيه سبحانه و تعالى ❤️
فما تغرِّك أي قصة مهما كانت رهيبة و مهما لمستي فيها السعادة الحقيقة ؛ خلي في بالك إنو مافي سعادة في الكون و ربنا ما راضي عننا 💔
فرجاء لما تمر عليكم صور أو قصص الكابلز ديل أدعوا ليهم بالبركة و اتجاوزوها عادي 🤷♀️ ما تعظِّموا الموضوع و تشاركوا في إنكم تصنعوا منهم المثالية و القدوة لحد ما يبقى ده النجاح بالنسبة للشباب أو ده الأصل في يوم من الأيام ..
خلونا نطمئن لأحكام ديننا و نعرف إنو ربنا ح يرضينا و يقر أعيننا و إنو مافي حاجة فايتانا و لا قصص حب و لا غيره طالما نحن بنلتمس الطاعة و نجتنب المعصية ❤️❤️
#رضي_الله_أولى_أولوياتنا 🌹
كتبته مروة عبد الوهاب❤️❤️❤️
BY يآليتني قدمت لحيآتي❤️
Share with your friend now:
tgoop.com/yalytanigadamtlhyati/1259