tgoop.com/wwwaligfr7/650
Last Update:
الى مولاتي الزهراء ع
حسين يريد حضنچ من يجي الليل
آنــه امــك گلتلـه ودمعتــي اتسيـل
خمس اسنين عمري_وانومنه اعله حجري
من يجي الليل
===================================١
لبست اهدومچ وگلبي انهدم حيله
ابحضنـي نـوميتـه وگمـت الـوليله
الـولــي اعليــه مــرّه ومــرّه انعيله
يشــم ابشيلتــچ وينـام كــل لــيله
عليچ حسين يمٍـه يهدّم الحيل
الليل الفاگد امه ابنومته ايعيل
ينام ودمعـه يجــري_وانومنه اعله حجري
من يجي الليل
===================================٢
أنه ابعازت حضن بس الوكت حتم
اصيـرن أُم لخـوي وبـالـحـزن أكتم
يتيمــه وجـرح گلبـي بعـد مـا يلتم
تنام الـناس وآنـه انصب الـچ مـأتم
انشف دمعي لو دمعات الحسين
هـوّه الـفاگـد امـه يلكه أُم ويـن
خلص صبره ويَّه صبري_وانومنه اعله حجري
من يجي الليل
===================================٣
الفاگـد حضن امه اعيونـه ما تغفـه
يضـل بردان ليله وسـاعه ما يدفـه
يا هــو الـيلوليلـه ابچلمــة الـتـرفـه
الـيذكر امــه مـا يلحگ عليـه چفـه
ما تلحگ تنشف ادموعه اديه
يفز حسين ويصيـح الـزچيه
اريـد اتبـوس نحري_وانومنه اعله صدري
من يجي الليل
===================================٤
مـا اذكـر نمـت بـالليـل حــد فجــره
يفـززنـي ســؤال احسيـن كـل مــره
يگلي ليش امـي اخـدودهـه حمــره
مرض لـو اثـر مـن الـباب لـو سطره
سطـرات امـن اگلـه ابخـدچ ايمـوت
سكتت واحس من گلبي طلع صوت
يشلـع اضلـوع صـدري_وانـومنـه اعله حجـري
من يجي الليل
===================================٥
ابـد ما لاعبه ويَّه اطفال مـن زغـري
خمس اسنين عمري ودمعتي تجري
يتيمه ومارحمني امـن الـزغر دهري
سولفتيلي بـالـطـف شنهـي الـيجري
اصبر الروح بيش وكلبي ايهيد
ومـن احسين راح ايحز الوريد
الشمر يذبح ابذخري_وانـومنـه اعلـه حجري
من يجي الليل
===================================٦
يـاراحــه الـتمـرنـي وكـربلـه اتانـي
اجيهه وتنـذبـح گــدامـي خـوانــي
وخمسين الـعمـر والــرکـض اذانـي
بـالـگــوه اجـــر الـنفــس خــلانــي
مــن عثـريـت ويشــوفـونـي الـناس
صاحوا من طحت هاي اخت عباس
الهضم حانيلي ظهري_وانومنه اعله حجري
من يجي الليل
===============================
✍حيدر الشغانبي
BY قناة الشاعر حيدر الشغانبي
Share with your friend now:
tgoop.com/wwwaligfr7/650