tgoop.com/wuhob/961
Last Update:
عله الناگه وتميلين ــ دخيلج يخت الحسين
مشيتي الله أكبر فوگ ناگه
الحبل ملگه عله جفوفج تلاگه
---------------------------------------------
مو معقوله زينب ــ بالسبي انتي وخواتج
مو معقوله زينب ــ تلعب الريح بعباتــج
عجيبه اخيالج ايبان
وستر وجهج بالردان
يزينب وين الاخوان
مو معقوله زينب ــ ماگرب لسه مماتج
مو معقوله زينب ــ طگو رقيه برضاتج
هــــاي عزيزة حسين
مجويات الايــــدين
يصطروها عله العين
يجرون الحبل حيل ــ دموم جفوفهه تسيل
من كثر الضرب ما عدهه طاگه ــ
الحبل ملگه عله جفوفج تلاگه
--------------------------------
دمعة عينج تگول ــ الاخت تحتاج اخوها
دمعة عينج تگول ــ الغـــرب بتكم سبوها
شالت بس الضعون
تتصيدهه العيون
صوط ايدور امتون
دمعة عينج تگول ــ الحرم وليه ولوها
دمعة عينج تگول ــ الحـــراير سلبوها
امشي واصفگ الراح
جم شامت علي صاح
كل ذاك الخدر راح
زينب جيتج امنين ــ عباس البطل وين
ادري ابكلبج اهواي اشتياگه ــ
الحبل ملگه عله جفوفج تلاگه
----------------------------
طفله بكترج اتلوذ ــ وتدور عن وليهــه
طفله بكترج اتلوذ ــ الشمر يسأل عليهه
بعيــونج تشوفيـن
شمر ذباح الحسين
رقيه يناشـدج وين
طفله بكترج اتلوذ ــ الحبل شمســوي بيهه
طفله بكترج اتلوذ ــ واثر جويه اعله اديهه
طفلــه بعمــر الورود
حبل بيديهه مشدود
اثر جف اعله الخدود
يبابا وينك تصيح ــ يطگها بحيله وتطيح
التراجيهه سلب وسوار باگه ــ
الحبل ملگه عله جفوفج تلاگه
-------------------------------
ما مرت عله البال ــ الگمر زينب يعوفج
ما مرت عله البال ــ الشمر عينه تشوفج
جاهيج الزمن دار
غريبه بوليه اشرار
ويرامونج بالحجار
ما مرت عله البال ــ الشگف بيد جفوفج
ما مرت عله البال ــ بيسر غربه التحوفج
امشي وتسأل الناس
ليش مهبـطه الراس
زينب وينـــه عباس
راح الكافلج راح ــ راسه بروس الرماح
عليج اتحتم الكافل افراگه ــ
الحبل ملگه عله جفوفج تلاگه
------------------------------
لسه بعينج جروح ــ وصور صعبه وفضيعه
لسه بعينج جروح ــ وأبو شابگ رضيعه
رضيـع بــسته شـــــهور
الگلب من عنده مفطور
رجــــع للـــخيمه منحور
لسه بعينج جروح ــ وجثث ضلت صريعه
لسه بعينج جروح ــ وگمر جفه گطيعه
سمع بسكينه تنخاه
راح وجـــوده ويـاه
طــاح ويـمه يمــناه
جربه بعينج اتسيل ــ بصدرج داست الخيل
وضعنج حادي صوب الشام سباگه ــ
الحبل ملگه عله جفوفج تلاگه
-----------------------------------------
دربج يگضي آهات ــ وسفر مابي گرايب
دربج يگضي آهات ــ وجرح شامت يعاتب
زينــب ﻻتــــــــــدنگين
امــشي ولا تخــافيـــن
يحرسج راس الحسين
دربج يگضي آهات ــ وگلب يحــــزانه ذايب
دربج يگضي آهات ــ وسكن وصط الخرايب
وبعد بهزيل النـــــوگ
بعبايه وجدم محروگ
يطبونج عله الســـوگ
ابيا كافل تلوذين ــ لسانج يلهج حسين
الحبل بيدج خشن يوجع اشباگه ــ
الحبل ملگه عله جفوفج تلاگه
-------------------------
https://www.tgoop.com/joinchat-AAAAAEHJ4Wlk6W_fs_hgyQ
BY الشاعر حسين باهض الحلفي
Share with your friend now:
tgoop.com/wuhob/961