tgoop.com/wuhob/3225
Last Update:
مشتاكه بكلب مايحمل الشوك
أنه امبجيه النوك وسايك النوك
احب مذبوح راسه برمح عالي
ولا مره حجه وكلي تعالي _ رقية
……………….
زغيره وجان حلمي بكد هوه الله
والمشتاكه روحه يموت سكته
طلعت امن الخيم وجروحي تحجي
مثل شايب حنته أهموم وكته
النار بثوبي فضحتني
عيون الناس شافتني
السوط ايلوح المتني _ هضيمة
طحت والخيل اجت تركض
الجانت بالضلوع أترض
فتر كلبي ماينبض _ حريمة
طحت حفنة دمع بحضان الرمال
لمتني السياط الخشنه الثكال
آنه الفاكده وضايعلي غالي
ولا مره حجه وكلي تعالي _ رقية
………………
تلكيت السياط بضهر محني
لحد ما هدل ثوبي وطاح متني
آنه الراكضه أعله الجمر توه
آنه الذابله المسطور جفني
أنجفي اعله الكاع لو طكني
أكوم الشمر يلحكني
اخاف الخيل تسحكني _ يبابا
نار وخيل مزدحمه
أعله باب الخيم ملتمه
الطف ماينحمل هضمه _ وعذابه
أركضت صوبك يبابا وخاني الحيل
مابيه تره اعله امراكض الخيل
حال الضيم بين الخيل حالي
ولا مره حجه وكلي تعالي _ رقية
…………………
اركضت من خيمتي النار اعله كدي
طحت يم جسمك مجوايه كلي
الحوافر ساحكتك روحه رده
شلونج بابا ماتكدر تكلي
أجيت اشرح ألك وضعي
سبكني المصرعك دمعي
آنه المنكسر ضلعي _ برفسته
الشمر مو بس كطع نحرك
الشمر مو بس سحك صدرك
الشمر داست وسط خدرك _ زمرته
يا بابا وخواتي بعازتك كوم
طشن بالفله من هجمت الكوم
والحرمه الوحيده تريد والي
ولا مره حجه وكلي تعالي _ رقية
…………………
ومشه بيه الوكت طفله اعله ناكه
عفت جسمك وراسك بيه يحدي
اترافكنه الدرب بس ماهي هينه
راسك عالرمح والدم يندي
حسبة تجيبك تردك
مسومر عالرمح خدك
أحسك سالفه عندك _ مصبيه
الدمه جامد عله عيونك
الصحاري بدلت لونك
هضيمة مكسرة أسنونك _ عجيبه
التراب مغطي إذنك شرد أحاجيك
وأنه أبلايه حجي جروحي تبجيك
سلاب التراجي أشكد بجالي
ولا مره حجه وكلي تعالي _ رقية
………………….
أصدلك ما أدنك خاف أضيعك
زحمه النوك والنسوان كثره
وجثيره ارماحهم تتفاوت أعلي
ونه اتباوك براسك نضره نضره
زغيره وحلمي سابكني
اشكد اتمنه تشبكني
شكلك والشمر طكني _ وسباني
وكت وياي ماتحجي
من غصباً علي أشجي
أسكت مره مره أبجي _ بحناني
أختصرلك بالسوالف ونته منحور
بناتك باجر إيطبن للقصور
وتطب جدامن روس الغوالي
ولا مره حجه وكلي تعالي _ رقية
…………………..
حسين باهض الحلفي
BY الشاعر حسين باهض الحلفي
Share with your friend now:
tgoop.com/wuhob/3225