tgoop.com/wuhob/3147
Last Update:
مو ضعينه أنسير بدروب المصاب
أدموع نتمشه على خدود التراب
عالنياك أرواح ماكو بس هياكل
أتجوع الحبال وبدينه أجروح تاكل
...............................
أنطينه للباري قرابين أشكثر
أنحور وجفوف وصواوين وخدر
أنطينه عين أمورمه ابجف الشمر
أمتون ما كضينه لسياط الزجر
أسكتنه بس بينه بجي أبكد البحار
الليل أستر تفضح أدموع النهار
أكبال شامت مايصح دمعك يسايل
أتجوع الحبال وبدينه أجروح تاكل
.................................
أتركت بالخيمه ألف ذكره الهلي
عطر أمي أوصاية الوالد علي
عفت جلمه اشكد احبهه الكافلي
حين كلي زينب أختي اتدللي
سبحة أمي ومعطف حسين الشهيد
ارماد صارن والهوه طشهن بعيد
مثل هضمي ياهضم بالطف يماثل
أتجوع الحبال وبدينه أجروح تاكل
.............................
أخذينه بس جوياتنه وضيم السبي
احترك كلشي العدنه من ورث النبي
ما سلمنه امن الحرك بس عالعبي
ابقينه بس نسوان وعيون أجنبي
نستحي امن اخيالنه انكوم ونطيح
الشامت يهد حيلي لو بسمي يصيح
اشكد سألني وكلي وينه أبو فاضل
أتجوع الحبال وبدينه أجروح تاكل
...............................
ننذبح كل عثره جدام الغرب
السوط ما بطل يلح طول الدرب
التبجي أكثر هيه أكثر تنضرب
أتموت سكته الباليسر تمشي غصب
حدبت حد ماطبك بالهم كفاي
بس عبايه أمشيت ورسوم وفياي
عفيه كلبي اشكد حزن وهموم شايل
أتجوع الحبال وبدينه أجروح تاكل
..............................
أمشي بثمانين طفله وي طفل
جرح ذان أرقية كاتلني كتل
أتصيح عمه اهواي أذاني الحبل
أتميل كل ساعه وتطيح امن الهزل
تكسر الخاطر زغيره اعله الحبال
أمجتفه إيديهه عكب ذاك الدلال
وينهه أوين السبي فوك الهزايل
أتجوع الحبال وبدينه أجروح تاكل
..............................
ناكه عرجه وخاويه اتكطع النفس
تعبتني ونكسر ضهري أحس
أبلا غطه من عدهه لعيون الشمس
اليوم وين أووين زينب بالأمس
أمس جانت قافله يباريهه حيد
هسه أمشي امكيده المجلس يزيد
بت علي ياوسفه هسه أبليه كافل
أتجوع الحبال وبدينه أجروح تاكل
.............................
خادم رقية ع
حسين باهض الحلفي
BY الشاعر حسين باهض الحلفي
Share with your friend now:
tgoop.com/wuhob/3147