tgoop.com/wuhob/3100
Last Update:
عوضوني بغيره خلوني اقتنع
ياهو مثله ابشبكته أيرخي الضلع
احب ملكاه
صعب فركاه
...........................................
ملكه تلاكينه- تشابكنه وبجينه- وجان الدمع واهس
شماله العشك يبجي- حاجيته ما يحجي- بطعم الهجر حاسس
صبت مدامعنه دمع احمر
نص جلمه راد يكول ما يكدر
مكطعه اوداجه شفرت الخنجر
وحجيتله حجايات بنعومت ورد
[أشبكني بابا وخل نذل طعم البرد
الهجر اذاه
صعب فركاه
..........................................
طعم العشك ملكه- ويتكمل بشبكه- ونبض الكلب يوكف
وانفاسنه تهاجر- وارواحنه تسافر- ونضراتنه اتسولف
كلمن يكل محبوبه مشتاكك
وضلوعنه نخليها تتشابك
يكلي واكله يكتل فراكك
نطيح للكاع ابجي وشهكت ضلع
واظهورنه نحنيها حد ما تنكطع
احن وانعاه
صعب فركاه
.........................................
بسته وترجيته- وبهيده حاجيته- وكتله البعد كاسر
ردت امسح ادموعه- يومي على ضلوعه- طاحنهن الحافر
بصدر الترافه الخيل شمكسره
ضلوعه لمستهن ماهن بصدره
خليت اديه وطاحن بحفره
حنيت ضهري وعسر بريتي الهوى
العبره خنكتني واحس ضلعي التوى
محال انساه
صعب فركاه
...........................................
ياهو الكطع راسك- وفوك الصدر داسك- ومكسره ضلوعك
باك العطش روحك- ومطشره جروحك- وميبسه دموعك
دمك يسيل وصبغ شيباتك
ذاري الترب يسفي على وجناتك
اكعد يبابا انسلبن ابناتك
الخيمه حركوها وجوه جدمي الجمر
عمتي زينب بابا سلبها الشمر
تصيح احاه
صعب فركاه
.........................................
ذبحو نبض كلبي- وباكو حلم تعبي- وعافيتي سلبوها
كتله افتح ايدينك- وصدلي بطرف عينك- ترجيتي باكوها
والسوط اكل نص من طرف زندي
والسطره اخذت وصله من خدي
وشكد مصايب بلكلب عندي
ابدي مين من ارد اسولف يا ألم
الوعه تبدي وياي من حرك الخيم
حنين وأه
احب ملكاه
..........................................
يلمنكطع نحرك- ومات الهوى بصدرك- ومفتره انفاسك
ياهو الكسر ضلعك- ياهو البتر صبعك- ياهو الكطع راسك
مطشر على حر الترب جسمك
معفر الشيب ومنسلب هدمك
مرمي أعله وجهك منسفك دمك
الحادي صاح يريد ياخذنه بأسر
تكوم لو امشي تحت رحمت شمر
اروح وياه
صعب فركاه
...........................................
حسين باهض الحلفي
BY الشاعر حسين باهض الحلفي
Share with your friend now:
tgoop.com/wuhob/3100