tgoop.com/wuhob/3082
Last Update:
يامن عفتني ورحت ـ تعرف وراك اشصحت ـ
بالخيمه عندك اخت ـ تاركها ياعباس
^^^^^^^^^^^^^^^^^^^^^^^^^^^^^^^^^^^^^
لمن شفت بيدك علم ـ والجربه فوگ متونك
خلفك يعباس اطلعت ـ ياخويه صحت بهونك
تدري اشحصل يابه الفضل ـ لمن تركت اضعونك
شفت انكتب موت وهجر ـ ياخويه وصط عيونك
رايح يماي النضر ـ ياخويه عوفه النهر ـ
شنهي العمر لو طحت ـ تاركها ياعباس
^^^^^^^^^^^^^^^^^^^^^^^^^^^^^^^^^^^^^
ماترضى لو صوتي انسمع ـ ونته ابعدت عن عيني
وي روحي كمت احجي همس ـ يابه الفضل تانيني
تسمعني ريتك يالگمر ـ ياخويه وتحاجيني
عباس بس مره التفت ـ راح اومي ايجفيني
ياخويه من تبتعد ـ خافن بعد ماترد ـ
ترجع لخيتك ردت ـ تاركها ياعباس
^^^^^^^^^^^^^^^^^^^^^^^^^^^^^^^^^^^^^
اشگد ذكريات اوياي الك يالرابي بين اديه
بگماطك وگلك وفه ـ وبيك اشكثر حنيه
لمن اجيلك تبتسم ـ روحك تعلگت بيه
وتبجي اشكثر لو شاهدت ـ جربة عذب مجفيه
ربيتك بناضري ـ ﻻتكسر بخاطري ـ
شيرده ذاك الوكت ـ تاركها ياعباس
^^^^^^^^^^^^^^^^^^^^^^^^^^^^^^^^^^^^^
جني اشوفك عالنهر ـ بالسهم طفو شوفك
وآنه انسبي ويمك اجي ـ وعيوني خويه اتشوفك
عباس عالناگه الجسد ـ والروح تبقه اتطوفك
يامن تروح اختك فده ـ لعيونك ولجفوفك
ابعينك اشوف السهم ـ امنيدك يطيح العلم ـ
ريت بدليلي انصبت ـ تاركها ياعباس
^^^^^^^^^^^^^^^^^^^^^^^^^^^^^^^^^^^^^
عباس انته أعله الثره ـ وآنه بيسر مجتوفه
عباس ماترضى الشمر ـ اعله اختك يشيل جفوفه
ياخويه افز من صيحته ـ وكلبي يموت بخوفه
يتلوه صوطه اعله المتن ـ من كربله للكوفه
ﻻتمشي محتاجتك ـ زينب تره بذمتك ـ
انه ابأمانك جنت ـ تاركها ياعباس
^^^^^^^^^^^^^^^^^^^^^^^^^^^^^^^^^^^^^
ياخويه بس عندك جنت ـ اشكي همومي وحالي
دورتك اشگد وصحت ـ وينك يسوري العالي
ومن ارفعت راسي شفت ـ راسك يلوح اگبالي
ماتگدر ترد الزلم ـ عادك دفك حبالي
تغفه عله راس الرمح ـ اگعد يشمس الصبح ـ
عفت العقيله ورحت ـ تاركها ياعباس
^^^^^^^^^^^^^^^^^^^^^^^^^^^^^^^^^^^^^
حسين باهض الحلفي
https://www.tgoop.com/wuhob
BY الشاعر حسين باهض الحلفي
Share with your friend now:
tgoop.com/wuhob/3082