tgoop.com/wuhob/3025
Last Update:
أشبيهه عين أرقيه➖مسطوره لو مجويه
زرگه حمره➖چويه سطره➖أشبيهه عين أرقيه
===============================
يابت حيدر عنهه أحچيلي➖أكثر من رمحي أتأذيني
أتماشيني وعيني أتصد بيهه➖بس گوه أعليهه أتماشيني
وردة جوري يمچ ضلت➖شو ذبلانه أنضرها أبعيني
معقوله أحچي أوياها وتسكت➖ما تگدر حته أتحاچيني
مكسوره بتي أشبيهه➖شو تعرج أبرجليهه
أشبيهه صفره ➖جويه سطره➖أشبيهه عين أرقيه
===============================
أحچي أوياها أشويه أتدني➖ما تدنه أبنيتي الحلوه
خافن ما تگدر توصلي➖بس لا چف رجليهه أمچوه
شو تفرك بيديهه أبنيتي➖وتهز رگبتهه وتتلوه
زينب حبل إيديهه أيعور➖وبرگبتهه الحبل أشسوه
خويه الحبل لو عتهه➖يصلخ جلد رگبتهه
يصعب أمره ➖چويه سطره➖أشبيهه عين أرقيه
===============================
حاچته او گالت يابابا➖شيسوي المكسوره أضروسه
تعرف ليش أتخورس حلگي➖من موقف بتك مخلوسه
أيجرجر بيه الگطع نحرك➖ونفاسي أمفتره ومحبوسه
يم جسمك ذباني وگلي➖شوفي أشلون الخيل أتدوسه
لمن يدوس الحافر➖نحرك أسمعه إيشاخر
من يكسره ➖چويه سطره➖أشبيهه عين أرقيه
===============================
كلما أصرخ يچوي إيديه➖گتله أشمالك طفله وميته
والله أتعورني أبجف إيدك➖أترك ذاني اشمالك أنته
شمسويه بقوتك تسطرني➖ليش أبچفك خدي أشلعته
ترضى حسين إيطگ أبنيتك➖ما سواها أورحت أذبحته
من عاتبيته بدمعي ➖گام ورفسني أبضلعي
رفسه عصره ➖چويه سطره➖أشبيهه عين أرقيه
===============================
زين أشمالچ دوم أمدنگه➖مرات أترفعين أعيونچ
بعدچ يابابا أمخوفينچ➖أتخافين أبسوط إيطگونچ
لو راسچ صعبه أترفعينه➖گد ما خدرانات أمتونچ
لو مستحيه أمصخم وجهچ➖أرماد الخيمه أمغير لونچ
يا حلوه يا رمانه➖مستحيه لو زعلانه
ليش أمفتره ➖چويه سطره➖أشبيهه عين أرقيه
===============================
إي يا بابا صح مستحيه➖مستحيه وكلش خجلانه
إنطوني أشوية ماي وجبته➖بيدي المچويه التعبانه
أتطشر من إيدي وما ضگته➖مقسوم أبقالك عطشانه
وهسه أتمنيت إيرد بيدي➖حته أروي أشفاك الذبلانه
مو حگي لو مستحيه➖يا لخضبولك لحيه
أنته أدره ➖چويه سطره➖أشبيهه عين أرقيه
===============================
https://www.tgoop.com/wuhob
BY الشاعر حسين باهض الحلفي
Share with your friend now:
tgoop.com/wuhob/3025