tgoop.com/wuhob/3011
Last Update:
لا تبچن - لا تحچن - سكوت - تعبان من ذبح أخوتچن
والتطيح أمن الهزل - أنزل أربطها بحبل - وجرها وره النوگ
****************************************
حاچاني الشمر چلمات - طاحن للهضم دمعات- والعباس حاچيته"
طبو للخيم والسوط - أخذ من المتن چم شوط - گلب العدو بچيته"
صرخ بينه سبيچن حان - زينب طلّعي النسوان- حضريهن.
هذا السوط-هاي أحبال-الهزله أتاني والجمال- شوفيهن.
إيعذبني - يهضمني-يصيح-بالخيمه ويشتّمني
نذل يتنخه أبنذل - أنزل أربطها بحبل - وجرها وره النوگ
****************************************
لسَّه أبريّتي الدخان-مهضومه وخلك تعبان- أعله اللچمات مابيه"
لميت أبعباتي أبنات- مرعوبات مسلوبات- ألم وچدام مچويه"
وحدتنه أبخدر مخنوگ-تطلع تصعد أعله النوگ- مسبيه.
أمتلوَّهن صريخ الگوم- وحده أتطيح وحده أتگوم- محنيه.
يحچلي - ويشكلي - جروح- أشگد نستحي أيگللي
ضعنه ونشت الشمل - أنزل أربطها بحبل - وجرها وره النوگ
****************************************
الكسره البينه كسرة موت- تمشي القافله أبلا صوت - والچلمات ممنوعه"
نسينه الحسره والويلاه- بسكته انجر حروف الآه - والانفاس مگطوعه"
الشمر يفتر علي فران - بسوطه يخوف النسوان - ياوسفه.
يحچيهه ويسمع الناس - ويلح بشتم عباس - ابو الكلفه.
ايلوعنه - ويهضمنه- شتمات - أشگد بالسبي سمعنه
صاح ودموعي أتهمل- أنزل أربطها بحبل - وجرها وره النوگ
****************************************
مشينه وچان درب أطويل- أستراحتنه ضلام الليل -ودروب السبي أشبيهه"
أعله كل طفله زغيره آثار - سطره ولسعه مالت نار - لوعتةْ حبل بيهه"
أكثر طفله بيهه آهات-شبعت بالسبي طگات رقيه.
بابا أبكل دقيقه أتصيح-يسطرها وترد أتطيح - خطيه.
أذوها-وبچوها-عذاب-أشگد بالدرب راووها
الدرب تعبهه وتمل- أنزل أربطها بحبل - وجرها وره النوگ
****************************************
شفنه الما يمر بالبال-سايگنه عدو وچتال- لاذمه ولاغيره"
وخوتي أنحور فوگ أرماح-يفتر بيهم الذباح- من ديره لعد ديره"
السوگ السوگ آه يالسوگ-أعيون أمفتحه وحلوگ- شماته.
تمنيت الگمر عباس - يحضر يفك من الناس - خواته.
الكلفه - والوسفه- الشمر - تنضر علي عينه الصلفه
لا يمل او لا يچل - أنزل أربطها بحبل - وجرها وره النوگ
**************************************** https://www.tgoop.com/wuhob
BY الشاعر حسين باهض الحلفي
Share with your friend now:
tgoop.com/wuhob/3011