tgoop.com/wuhob/3005
Last Update:
يشايل عن نضر عيني
أفراگك يذبح أسنيني
أشعجب تقبل تبچيني - حبيبي
رحت ودموعك أتگلي
بعد هيهات ترجعلي
أبغيابك بالعمر شلي - حبيبي
=========================
وينك - رايح وماخذ دليلي وروحي
وينك - يلي فززت الالم بجروحي
وينك - أخلاف عينك ما يهود نوحي
وينك - راح أسميك العشگ مذبوحي
أنگلت الجدم - من الخيم - وآنه أبألم - أصيح
راح الورد - من يبتعد - ما ضن يرد - صحيح
خلاني أبألم وحدي - حزينه ودمعتي أبخدي-
الشوگ أبخاطري إيندي - حبيبي
شناطر ودري من يطلع - بعد هيهات ما يرجع -
أصيح وحته ما يسمع - حبيبي
========================
بابا - والله أحبك يابعد دلاَّلي
بابا - الخاطر أدموعي تحن الحالي
بابا - والله ما عندي أبمعزتك غالي
بابا - من تروح أبدنيتي أشيحلالي
يافرحتي - او ياهيبتي - أوياشمعتي - أوضواي
طاري الهجر - مر طبعه مر - يكسر كسر - گفاي
أجروح الف وتسعميه - راح أيخضرن بيه -
تموت أخلافك أرقيه - حبيبي
يمعشوك الورد الاحمر - جمال الدنيه أبو الاكبر
-طفله وعودي بعده أخضر - حبيبي
========================
روحي - ياملذة روحي ليش أتهاجر
روحي - راح تنتضرك كسيرة خاطر
روحي - أوياك أخذهه أتضوگ دوس الحافر
روحي - صعبه بالخيمه تضل أتناطر
أفراگك جمر - وين الصبر-تدري الهجر -مصاب
گمت وطحت - لمن شفت - عني رحت-عذاب
أصدلك والنضر عبره-السيوف أتزاحمت كثره-
كلهه أتطالب أبنحره - حبيبي
ولن صوت الحجر كاسر-صوّب راسك الضاهر -
بچيت أبكسرة الخاطر - حبيبي
=========================
أبهيده- أمشيت والخوف إيخفگ بعضامي
أبهيده- البابا تطلع والشمر جدامي
أبهيده - أحچاية الوينك حبيبي الضامي
أبهيده - ثگل كلَّش بيه نگل أجدامي
أمشيت الدرب -عثره ورعب-بين الغرب -وميل
من كل كتر-واگف شمر- سوط الغدر - يشيل
التفت ولن شفت يمه-أبوي أمخضب أبدمه-
عاري ومنسلب جسمه - حبيبي
أجيت أركض تلگاني - نهرني وصوته بچاني - صحت بابا محاچاني - حبيبي
===========================
الگيته - عله أخدوده أميبسات أدموعه
الگيته - أثنين أديه أمن الزند مگطوعه
الگيته - شفته مشگوگه وسهم بضلوعه
الگيته - أملوعاته الخيل حد اللّوعه
صارت صدگ-رب العشگ- شابع سحگ-خضيب
سهم الحقد- مارد مرد- نص الچبد - عجيب
نشف من النزف دمه- ميته أبداخله الهمه-
الرماح أمكسره أبجسمه - حبيبي
ما سالم كتر منه - حرت أمنين أحضننه -
أول تالي أضيعنه - حبيبي
=========================
نايم - والسهام أبنص دليلك غافيه
نايم - ياحنين أجروح جسمك دافيه
نايم - ها يمسلوب الهدم والعافيه
نايم - وآنه مچويه الادين وحافيه
صبع أنبتر - صدر أنكسر- دامي النحر - حسين
جسمك نزف-حد ما نشف- يابو الترف- حنين
آوصالك ترسن الوسعه-الحافر نابت أبضلعه-
السنابك جسمك أتگطعه - حبيبي
جسمك دامي متوذر- أهنا چف بي نقص خنصر-
أهنا چبدك دمه إيگطر - حبيبي
=========================
https://www.tgoop.com/wuhob
BY الشاعر حسين باهض الحلفي
Share with your friend now:
tgoop.com/wuhob/3005