tgoop.com/wuhob/3003
Last Update:
أباب الخيمه مدفون
والنار - وصلت باب الخيام
أشم عطاب الگماط
والخيل - سحگتگ بالجدام
دلول - عبدالله يغالي
دلول - ياسهر الليالي
=•=•=•=•=•=•=•=•=•=•=•=•=•=•=
سهرت أعليك حد ما طاحت أجفوني
أم عبدالله خوانك يسموني
ياعطر الورد يا فتشة أعيوني
آهات ودموع - يمرخي الضلوع-أبچيك ونعي
طشرت الاحلام-بدروب الأيام-ويسيل دمعي
أگضي الليل أناغيك-أحاچيك-حبيبي وگرة العين
تذوبني أبمعانيك-يمدلول-أزغيرَّ بزرة حسين
دلول - ياگمره وتلالي
دلول - ياسهر الليالي
=•=•=•=•=•=•=•=•=•=•=•=•=•=•=
خذاك حسين من إيدي وبچت إيدي
أستحيت أحچيهه دير بالك عله اوليدي
بچيت أشبيك يمه كزبر أوريدي
ونيت وبچيت-بهداي حنيت-ياروح أمك
بيدين الحسين-وسمعت الونين-لحضانه ضمك
خذاك وللعده راح-أسمعت صاح-أميه أوليدي تعبان
أبسهم طشر معانيك-وويلاه- الدمَّك چان عطشان
دلول- أبسهم ذبحو دلالي
دلول - ياسهر الليالي
=•=•=•=•=•=•=•=•=•=•=•=•=•=•=
رگبتك مايله وعيونك أمفتره
ودمعتك يابسه أعله خدودك أمكسره
نص السهم بعده أمچلب أبنحره
چن طير مذبوح-ودماك مسفوح- ياليل تعبي
رديت مچتول-بگماط محلول-وعيون تربي
ميته الچلمه بشفاك-والموت-باگ أشگد عبارات
العبره أمچلبه بالريج-مخنوگ-أبني أتحسر ومات
دلول- أتفارگ روحي تالي
دلول - ياسهر الليالي
=•=•=•=•=•=•=•=•=•=•=•=•=•=•=
حفرنالك لحد نص متره مو أكثر
أنهيل أتراب فوگك خاف تتعور
رمال الخشنه تلچم گطعة المنحر
دفنوك بدماك-والروح وياك-مابيه أودعك
يم باب الخيام-أحسلك أتنام-من تبچي أسمعك
أذا ونيت أحس بيك-أجي ليك- ومسح بيدي دمعك
أذا فزيت جوعان(عطشان)-أجي أبساع- وأرضعك
دلول- مهدك يمه خالي
دلول - ياسهر الليالي
=•=•=•=•=•=•=•=•=•=•=•=•=•=•=
ومن طاحت زلمنه والخيم شبت
الخيل أعلينه عنوه أتعنت وطبت
أعله گبرك صالت وفوگه أشكثر دبچت
ياريت الخيول-أتصول وتجول- أعله ضلوع أمك
مذبوح-مسحوگ-بالنار محروگ-شيحمله همك
تواسي أبموتك حسين - يمدلول-حته أبسحگة الخيل
هم عطشان ذبحوك- داسوك- الحوافر جسمك أتشيل
دلول - يالعذبتو حالي
دلول - ياسهر الليالي
=•=•=•=•=•=•=•=•=•=•=•=•=•=•=
حفرو گبرك وطلعوك من عنده
رغم أتراب لحدك تشبه الورده
گتلهم أريد أمسح رمل خده
إيصيحون جيبوه-والراس گطعو-ونطوها جسمه
برماح شالوك-وردود ذبحوك- وتصيح يمه
شلتك بس بلا راس -ياناس أريد أرضع حبيبي
ذبحتوه وهو عطشان-جوعان-عليه إيدر حليبي
دلول-أحچايه ما حچالي
دلول - ياسهر الليالي
=•=•=•=•=•=•=•=•=•=•=•=•=•=•=
https://www.tgoop.com/wuhob
BY الشاعر حسين باهض الحلفي
Share with your friend now:
tgoop.com/wuhob/3003