tgoop.com/wuhob/2997
Last Update:
يا آيه تترتل نغم دافي
تتعثر حروفك عله أشفافي
مدري أخو مدري عشكَ مدري إحساس"
مدري نبي مدري ملك يا عباس"
@@@@@@@@@@@@@@@@
حته اليعشكك ماعرف سر ذاتك
تتونس أعيوني برسم وجناتك
ماكَتلي خويه تستحي أحجاياتك
جلمة الخويه أمجلبه بلهاتك
نزف الكَلب شيكضه-أبشرياني تعثر نبضه
عباس ترحل عني-خويه الكَلب ما يرضه
بلسم جروحي ولذة الخوه
يامن جبينك ينكَط أمروه
مدري ورد مدري نده أبعطر الياس"
مدري نبي مدري ملك ياعباس"
@@@@@@@@@@@@@@@@
ياخلكَ حيدر ياطعم نفسيتك
أمك وبوي أشتركو بتربيتك
شتصير إذا أم الوفه أمغذيتك
زينب يخوها الكافل أمسميتك
يخيالهه وهيبتهه-اليمسح أثر خطوتهه
تنكسر مثل الحاجب-لو شاهدت شيلتهه
يا آية الله الكافل السوره
نغم الصبا ومعزوفته وطوره
هالكَد عذب هالكَد حلو بلا مقياس"
مدري نبي مدري ملك ياعباس"
@@@@@@@@@@@@@@@@
يالماخذ أحلامي وتريد الروحه
وعايفلي جم دمعه بجفن مفضوحه
شتضن بخوك شلون تسكن روحه
ما يكَضي يومه الفرحته مذبوحه
محتاج الك بس انته-ضهري ودليلي اكسرته
بوداعك أتعذبني-تتركني صارت يمته
راح ادعي دعوة منكسر ضهره
ياربي رجّع كافل الحره
تحفظ إلي راعي الفخر من هالناس"
مدري نبي مدري ملك ياعباس"
@@@@@@@@@@@@@@@@
أجروح فكدك ماتيبس خضره
خويه التفتلي جن نسيت العشره
ضهري أنحنه وسمعت طكَت ضهره
أطراف شيب الحيتي طخ بالغبره
والسيف يبجي أعليه-خلافك صبح عوجيه
تركض أجت تسندني-من الخيام أرقيه
عباس بالعباس أحبنك
لاتبطي خويه أبناتي يردنك
أتهد الزلم أتطيح الخيام وتنداس"
مدري نبي مدري ملك ياعباس"
@@@@@@@@@@@@@@@@
ماريد ماي وأنته ياعباسي
ماخذ هواي البي تعيش أنفاسي
من بعد عينك يابجية ناسي
أبجي وهضم للكَاع أدنك راسي
أعليماً بعد تسألني-الخنجر بده يغازلني
يمعذّب الخياله-الخياله أجت تسحكَني
محروسه خويه الجربه والرايه
لو طاحن حسينك يشت رايه
ياهيبتي أبخيل العده راح أنداس
مدري نبي مدري ملك ياعباس
@@@@@@@@@@@@@@@@
أشكَد راح تبقى أعيوني الك مشتاكة
هديت حيلي وما بكَتلي طاكَه
نتلاكَه باجر عالرمح نتلاكَ
نبجي ونبجّي الرايحه أعله الناكَه
أشتاك أشبكك باجر-أويه الضعن من نسافر
أبلا جثث من نتشابك-ناضر ويشبك ناضر
وحجيلك شسوه الشمر بيه
حز نحري وآنه بعازة أميه
بسمك صحت خويه ومتت بهالانفاس"
مدري نبي مدري ملك ياعباس"
@@@@@@@@@@@@@@@@
https://www.tgoop.com/wuhob
BY الشاعر حسين باهض الحلفي
Share with your friend now:
tgoop.com/wuhob/2997