tgoop.com/wuhob/1798
Last Update:
إيفز الجرح ونتچي
وتسند أعله البچي
بالعيون ➖ ماضل دمع ينحدر
بالعيون ➖ أمن أحبابي محد يمر
…………………………………………………………… ....
دار الزمان ودرت➖وگتال طبع الوگت➖لو دارت مايرحم
نجمه بعيون السهر➖أغفه أبحنان الگمر➖الليل لو خيم
طفّو ضواه وضعت➖أشما أصيح خويه أشرگت➖بغيابه أجرع سم
ياللأسف والأسف
أعليه الزمان أختلف
بالعيون➖ ماضل رسم للخدر
بالعيون ➖ أمن أحبابي محد يمر
…………………………………………………………… ....
أم الخدر والبخت➖والماكو مثلي أخت➖ومدللة حيدر
والعالمه الفاهمه➖إيسموني بت السمه➖أيقصدونهه الكوثر
ركضني ركضه الدهر➖وضهري أعله أخوتي أنكسر➖أعليه الشمر يفتر
چم كربله أبضامري
تكسر گلب خاطري
بالعيون ➖ چم الف كسر وكسر
بالعيون ➖ أمن أحبابي محد يمر
…………………………………………………………… ....
نار بخيامي شفت➖وبعيوني طاح الخفت➖وين الدرب مدري
ضليت أدعّم وجر➖وبرجل خيل أنهطر➖وتوسل أبخدري
أبوجهي يصيح الشمر➖أجفل ورد للجمر➖والسوط أكل ضهري
وين الحنين الشهم
الخيمه حشرت زلم
بالعيون ➖ حسّيت يچوي الجمر
بالعيون ➖ أمن أحبابي محد يمر
…………………………………………………………… ....
لحگونه يهل الستر ➖طب الخيمكم شمر➖والخيل مو حذره
جدامي طفل أنهطر➖حدر الحوافر حشر➖الحافر فتح صدره
جريته بيدي أنگطع➖أمن أطفال مسلم طلع➖عمر الورد عمره
عباس وينگ صحت
طگني أعله راسي وطحت
بالعيون ➖ شفت الأسه أمن الشمر
بالعيون ➖ أمن أحبابي محد يمر
…………………………………………………………… ....
أحاه يسوط الشمر➖فرهد أمتون الخدر➖وطشر بنات أشگد
ولسكينه مدمع يهل➖أبرگبتهه خلو حبل➖أوچف أعله چف تنشد
وصوت الرقيه أستمع➖كسرو يعمه الضلع➖ونسطرت أعله الخد
أشكد حشمت بخوتي
كل همي بعبايتي
بالعيون ➖ أكبال الشماته أنهطر
بالعيون ➖ أمن أحبابي محد يمر
…………………………………………………………… ....
إيدوّر عليه زجر➖إيصيح أرد أغث الخدر➖جدامي خل تحضر
أشلع گلب بت علي➖جروها جيبوها إلي➖أفجعها أريد أكثر
أمن حسين صوغه جبت➖فز گلبي وستغربت➖وصله أويه دم أحمر
بيهه أفتح وعاينت
خنصر ومحبس شفت
بالعيون ➖ حسيت سهم أستقر
بالعيون ➖ أمن أحبابي محد يمر
…………………………………………………………… ....
@wuhob
BY الشاعر حسين باهض الحلفي
Share with your friend now:
tgoop.com/wuhob/1798