tgoop.com/wsamkh/788
Last Update:
قصيدة نزلة بحق ناصر الامام الحسين (وهب) رضوان الله تعالى عليه
وهب وهب وهب .. يبو گلب الذهب
----------------------------------------
المثلك ايصير وعلي لو مايصيـــر
گبل شيلة صارمك شايل ضميــــر
الله رادك خادم بمنصب اميـــــــر
الخلفت مثلك وحگك ما تحيــــــر
يألمعجب العجب .. يبو گلب الذهب
----------------------------------------
هذا شان الينصر احسين الغريـب
على مر الدهر ذكره مايغيــــــــب
شكثر ماخذ زود من عمك حبيب
التصيبه بسيفك ابدا ما يطيــــب
يموت بهألسبب .. يبو گلب الذهب
----------------------------------------
انت يانعم المناصر للحسيـــــــن
اشتريت الاخره بدم الوتيـــــــن
الف هنيالك يبو گلب الحنيــــــن
بالمواقف صلب حر وما تليـــــن
المثل بيك انضرب .. يبو گلب الذهب
----------------------------------------
موقف امك ينذكر يوم الطفوف
بمصرعك للمنضر الدامي تشوف
مره لاچن ابد ما مراهه خـــوف
بألعمد هدت تحارب بالصفــوف
اليگابلهه انرعب .. يبو گلب الذهب
----------------------------------------
واست الزهره ام وهب ياوهب بيك
و ابد ماناحت ولا ونت عليــــــــــك
فدوه لبن الزهره امك ترتجيــــــــك
وصار واجب للشفاعه تعتنيــــــــك
فزت يالمنتجب .. يبو گلب الذهب
----------------------------------------
مثلك انريد بزمنه ياشهيـــــــــــــد
عن عقيده يموت عن مبدأ رشيــد
ابد ماخليت ابو اليمه وحيـــــــــد
وهب للاجيال صار اسمك نشـيــد
خلودك هألوجب .. يبو گلب الذهب
----------------------------------------
للشاعر وسام الغراوي
@wsamkh انضمام
@Wskh12 تواصل
BY الشاعر الحسيني وسام خيون الغراوي
Share with your friend now:
tgoop.com/wsamkh/788