tgoop.com/um_ali313/20629
Last Update:
قصيدة للسيدة معصومة
{{ لكل محروم من زيارتها }}
#المستهل 👇🏻👇🏻👇🏻
وفقينـي يااخت الرضا وفقيني
لزيارتج كون بعجل سجلينـي
يايوم ادوس اعتابچ
واوكف بعتبة بابچ
لزيارتچ كون بعجل سجلينـي
•───✧◐❤️🔥◐✧───•
لزيارتچ يخت الرضا مشتاكه
امنيـتي اوصل يمچ ونتـلاكـه
حسره بدليلي ونارها حراكـه
اوصل ضريحچ بالعجل
مولاتي زيحي كل حمل
بجاه ابوچ الكاظم تسندينـي
لزيارتچ كون بعجل سجلينـي
•───✧◐❤️🔥◐✧───•
ناخيتچ ومنچ ردت هالنظـره
كون بضريحچ يالنجيبه اقـره
انصب عزية وحاظرتها الزهره
يصير اللطم عالهامه
ونـكـابـل اللـطـامـه
لحظه بضريحچ انسه بيها سنيني
لزيارتـچ كـون بـعجـل سجلينـي
•───✧◐❤️🔥◐✧───•
دوم انخه واطلب منچ الزياره
منتظره خيرچ مااظل محتاره
وبعينـي اشاهد كْبتچ ومنـاره
يمچ اعيش الصوره
وبمرقدچ مسروره
يخت الرضا ادريچ ماتنسينـي
لزيارتـچ كون بعجل سجلينـي
•───✧◐❤️🔥◐✧───•
الزارچ يغاتي تنغفرله ذنوبـه
طاهر يرد منچ وابيض ثوبــه
چن زاير الكعبه وعلنها التوبه
يمچ اعيش من جديد
ويصيرلي يمـچ عيـد
مچـلبه بـعباتـچ رايده تقبلينـي
لزيارتـچ كـون بـعجـل سجليني
•───✧◐❤️🔥◐✧───•
ابقى اطلب ومامل ابد دعواتي
وفقينـي كون بخدمتچ يـاغاتـي
وابچي لحزنكم ماتجف دمعاتي
عليكم اصب الدمعه
ونواسي بيها البضعه
ونصيح زهره بدفترچ كتـبيـنـي
لزيارتـچ كـون بـعجل سجلينـي
•───✧◐❤️🔥◐✧───•
#جديد2023
بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج
https://www.tgoop.com/um_ali313
BY الشاعرة والمله ام علي الإماره
Share with your friend now:
tgoop.com/um_ali313/20629