tgoop.com/um_ali313/20566
Last Update:
#قصيدة_لديار_الحسين
{ مستهل القصيدة }
للدار اطب خلوني - وارد اعمي بيها عيوني
واذكر الكعده اويه الأهل
واتمنـه موتـي بالعجـل
ارد اعمي بيها عيوني 2
•───✧◐◐✧───•
يم عتبت الباب ارد اصيحآ وين الأخوان
دكيت باب اهل المجد كعدو يالحنان
محد يجاوب من صحت موحشه الديران
بس الصدى يردلي يخوتي وحالي تعبان
ميتين ماواحد عدل
واتمنه موتي بالعجل
وارد اعمي بيها اعيوني 2
•───✧◐◐✧───•
توجعني يادار اخوتي دار الحسين وعباس
الجانت زهيه منوره بوكعتهم وطاح الساس
ومنين اجيبنهم بعد كلهم حميه ونوماس
بت حيدر انه مدلله تالي ارجعت وي ارجاس
مجتوفه جابوني بحبل
واتمنه موتي بالعجل
وارد اعمي بيها عيوني 2
•───✧◐◐✧───•
مالوم عيني لوبچت لفراك ذيچ الأحباب
الچانو اوياي بكل مسه صّبحو كلهم غياب
والدار من عكب المشو غاطيها ياناس اتراب
واني على افراك اخوتي والدمع مني سچاب
هيهات يلتم الشمل
واتمنه موتي بالعجل
وارد اعمي بيها عيوني 2
•───✧◐◐✧───•
متعود ايام المضت چانت زهيه وياهم
وياچلمة الخويه بعذب يكولوها لي اهواهم
مية هله بالغاليه يكلولي واتعناهم
مااكدر انسه عشرتي وماينحمل فركاهم
عشرتنه مابيها ملل
واتمنه موتي بالعجل
وارد اعمي بيها عيوني 2
•───✧◐◐✧───•
مااملها ياعشرة هلي للروح مثل البلسم
شمحلاها وبوكت العصر كل يوم لمن نلتم
وبجال اخوتي امددله وللدنيا ابد مااهتم
تالي غدر بيه الزمن والضيم بيه اتلملم
واصبحت مركز للعلل
واتمنه موتي بالعجل
وارد اعمي بيها عيوني 2
•───✧◐◐✧───•
#2022
بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
https://www.tgoop.com/um_ali313
BY الشاعرة والمله ام علي الإماره
Share with your friend now:
tgoop.com/um_ali313/20566