tgoop.com/udgjvdsgv/3388
Last Update:
🟢لو زول وقع قدامك فجأة وبدا يرجف؟! تعمل شنو🤔⁉️
الموقف دا ممكن يكون صدمة كبيرة، لكن مهم تعرف إنو ممكن الزول دا يكون عندو نوبة صرع، ودي ما معناها جن ولا مس! دا مرض طبي معروف، وتعاملنا السليم ممكن ينقذو من أذى كبير.
🧠اول حاجة خلونا نعرف مرض الصرع -Epilepsy- هو شنو؟
الصرع هو مرض عصبي مزمن – Chronic Neurological Disorder
يعني بيأثر على الجهاز العصبي المركزي، وبالذات على الدماغ – Brain.
الدماغ شغال بالإشارات الكهربائية.
أي معلومة أو حركة أو إحساس في جسمك، بتتم عن طريق إشارات كهربائية بين الخلايا العصبية – neurons.
لكن في الصرع، فجأة بتحصل فوضى كهربائية في الدماغ...
الإشارات بتتلخبط، وتجي موجة كهربائية زيادة عن اللزوم، فتظهر على شكل نوْبة صرع – Seizure.
💥 شنو النَّوْبَة seizure؟
النوبة هي لحظة بيحصل فيها اختلال مفاجئ في نشاط الدماغ، بتخلي الزول:
✓ يرجف (تشنجات عضلية – convulsions).
✓ أو يسرح ويفصل عن الواقع (absences).
✓ أو يقع فجأة.
✓ أو يفقد الوعي تمامًا.
✓ أو حتى يضحك أو يخاف بدون سبب واضح.
يعني النوبات ما كلها نفس الشكل، عشان كده لازم نعرف النوع.
🔍طيب أسباب الصرع شنو؟
- أسباب وراثية – لو في تاريخ عائلي.
- إصابة في الدماغ: من حادث أو سقوط.
- جلطات دماغية أو نزيف.
- أورام في المخ.
- تشوهات خلقية في الدماغ.
- التهابات الجهاز العصبي (زي التهاب السحايا – meningitis).
- وأحيانًا: السبب ما معروف – ودا بنسميه idiopathic epilepsy
⚡️هل كل نوبة معناها صرع؟
لا!
لو زول جاته نوبة واحدة بس في حياته، ما بنقول عنده صرع.
الصرع هو: نوبات متكررة بدون سبب مباشر. يعني يكون في خلل مزمن في كهرباء الدماغ، ما بسبب حرارة أو سكر أو تعب عابر.
🧬هل الصرع مرض عقلي؟
لاااااا
الصرع مرض عصبي – Neurological، ما ليهو علاقة بالجنون ولا المرض النفسي.
وكتير من المصابين أذكياء، ناجحين، وعادي جدًا يعيشو حياتهم كاملة لو لقوا العلاج والدعم.
📌أنواعه شنو؟
1- Partial Seizure (صرع جزئي): النوبة تبدأ في جزء واحد من المخ.
2- Generalized Seizure (صرع عام): النوبة تشمل المخ كله.
3- Unknown Onset: ما معروف بالضبط وين بدأ .
👏اسعاف المصاب بنوبة الصرع:
أول حاجة تعملها لو شفت زول عندو نوبة صرع قدامك:
✅أول حاجة لازم تلتزم الهدوء وتبعد التجمهر حولين المصاب.
✅إزالة وإبعاد أي حاجة حادة ممكن تسبب ضرر للمصاب.
✅اتجنب تخت أي حاجة في فم المريض.
✅ادعم رأس المريض بمسند عشان تمنع ضرب رأسه بالأرض.
✅احذر تمامًا من إنو تثبت المصاب أثناء النوبة⚠️
✅حرك المصاب على احد جانبيه عشان تساعد عملية التنفس عندو.
✅راقب المصاب طوال فترة النوبة.
🚑متين بستدعي الامر انو نتصل بالإسعاف و الطوارئ؟
🔹في حالة استمرت النوبة أكثر من 5 دقائق.
🔹في حالة استعاد المصاب الوعي واتكررت النوبة مرة ثانية.
🔹في حالة عدم عودة التنفس الطبيعي أو اصابة جسم المصاب بـ أذى أثناء النوبة.
💊 علاج الصرع – Epilepsy Treatment:
الصرع ما عندو علاج نهائي 100% في كل الحالات، لكن في ناس كتار بيعيشو طبيعي جدًا طالما ملتزمين بالخطة العلاجية.
1. أدوية مضادة للصرع – Anti-Epileptic Drugs (AEDs):
دي الخط الأول للعلاج.
وهي أدوية بتنظم النشاط الكهربائي في المخ وبتقلل أو تمنع النوبات.
🧠 شنو أشهر الأدوية؟
Carbamazepine
Sodium Valproate
Lamotrigine
Levetiracetam
Phenytoin
🕒 بياخدوها يوميًا، بجرعات يحددها الطبيب حسب:
✓نوع الصرع
✓عمر المريض
✓وزنه
✓الحالة الصحية العامة
📌 مهم جداً ما توقف الدواء فجأة! حتى لو النوبات اختفت.
2. الجراحة – Epilepsy Surgery:
دي ما للكل، لكنها خيار لبعض الحالات:
لما يكون الصرع ناتج من منطقة محددة في الدماغ
ولما الأدوية ما بتفيد
الجراح بيشيل الجزء المسؤول عن النوبات (زي لو في ورم أو تشوه خلقي).
💡معلومة مهمّة:
الصرع ما معدي، والزول المصاب بيه ممكن يعيش حياة طبيعية جدًا لو اتلقى علاج سليم وتعامل الناس معاه بفهم ووعي💜
👏لايك وتعليق بقلوب🤍🤍🤍🤍
لو البوست كان مفيد بالنسبة ليك🌷
✍️الصيدلانية: Samah Mustafa
🔍المصادر العلمية:
-Epilepsy Foundation
-WHO
-وزارة الصحة السعودية
-Mayo Clinic
#معلومات_دوائية #توعية_صحية #اسعافات_أولية #صيدلة
BY معلومات طبية ع الماشي
Share with your friend now:
tgoop.com/udgjvdsgv/3388