tgoop.com/tsmimk/4378
Last Update:
⚘صلاتي حياتي ⚘
الناس اللي مش عارفة تخشع في الصلاة .. عاوز اقولك على شوية تفاصيل كده تخليك تحب الصلاة و توصل لدرجة الخشوع و تنتظم فيها لأنها هي الأساس اللي هتخلي مزاجك كويس و نفسيتك مطمئنة...
امشي بمبدأ انه صلاتك مش حاجه روتينية و مُجبر تعملها .. لاء بالعكس انت بتكون رايح تقعد مع ربك شوية...
و هتقعد معاه خمس دقايق بس فى كل فرض .. كتير على اللي أنعم عليك بكل حاجة؟
قبل كل فرض استعد للصلاة و كأنك رايح تقابل حد بتحبه جدا
روح و أنت ملهوف .. و لو حد سألك رايح فين : قول رايح اقعد مع ربنا شوية خليه احساس داخلي جواك
و أول ما ترفع إيدك و تقول : الله اكبر.. ابتسم ابتسامة مشتاق .. قولها و جواك صوت بيقول ( جيتلك يارب يا حبيبي وقفت بين ايديك).. انسى الدنيا كلها بمشاكلها و همومها فى اللحظه دي...
اقرا الفاتحة بكل راحة واسمع جواب ربك بعد كل آية .. و متقولهاش بسرعة و كأن حد بيجري وراك 💜
و فى الاعتدال من الركوع لما تقول " سمع الله لمن حمده "
احمده انت بطريقتك .. قول" الحمدلله يا رب على كل النعم اللي اديتهالى" , " الحمدلله حمدا طيبا مباركا كما ينبغي لجلال وجهك و لعظيم سلطانك " :
و أول ما توصل للسجود افتكر انه أقرب ما يكون العبد لربه وهو ساجد .. لما تهمس ببطن الأرض و بيسمعك من في السماء... سبح ربك و ابدء احكيله كل اللى في قلبك قول يا رب انا بحبك .. (يارب خليك معايا فى المحنة دى) .. (يا رب انا تايه وجهنى للطريق الصحيح) .. (يارب انا محتار في الموضوع الفلانى ساعدنى) .. احكي و فضفض لإن محدش هيفهمك و لا هيحس بيك زى اللي خلقك
لما تحكي معاه مش هتلاقى حواجز بينك و بينه .. و احكي بالعامية مش لازم لغة عربية فصحى يعنى 😀 .. هو اعلم بحالك منك بس بيحب يسمع صوتك 🙂 .. يمكن تتلخبط في كلامك بس هو فاهم انت عاوز تقول ايه .. و صدقنى مهما كانت مشكلتك كبيرة و صعبة .. فى آخر كلامك هتحس براحة مش طبيعية و هتبتسم لانك سلمت امرك لرب العباد 🙂
و بعد ما تخلص صلاة .. سلم عليه بس مش السلام التقليدي
لانك دلوقتى بتسلم على حبيبك .. تخيل انك بـ تقول ( هيوحشنى الكلام معاك يارب امتى تيجي الصلاة الجاية عشان أرجع اقعد معاك تاني لسة في كلام كتير فى قلبي حابب احكيلك عليه) 🙂
صدقني أول ما تخلص صلاة هتحس بعدها انه مفيش حد أدك فى الدنيا.. مش تكبر و غرور... لكن راحة و طمأنينة لانك كنت قاعد مع ربك .. مع حبيبك.. و سلمته أمرك و توكلت عليه و لانه لما تواجهك أي مشكلة فى يومك مش هتهز شعرة منك .. عارف ليه؟ لأنك هتروح فى الصلاة اللي بعدها و تحكي لربك و تطلب منه يساعدك 🙂
و يا بخت اللى يعرف معنى الوصال مع رب العالمين .. ربنا يرزقنا و اياكم الثبات و الخشوع فى الصلاة. ❤️
كل حد هيشوف البوست ده بسببك و ينتظم في الصلاة ليك أجره ضعفين الدال على الخير كفاعله..
#copied
BY ملصـ❤ـقات دعوية
Share with your friend now:
tgoop.com/tsmimk/4378