دردشة سريعة عن الـ OAuth 2.0 💡
.
.
تخيل إنك داخل تسجّل في تطبيق جديد علشان تتابع كورسات، ولما جيت تسجّل، التطبيق قالك:
"تقدر تسجّل بحساب Google أو GitHub بدل ما تعمل أكونت جديد"

ضغطت على زرار "Continue with Google"، وGoogle طلبت منك تختار الإيميل وتوافق على شوية صلاحيات.
بعدها التطبيق فتح واشتغل وكأنك عملت sign up فعلًا...

إيه اللي حصل هنا؟ 🤔
اللي حصل بالضبط هو إن Google استخدمت حاجة اسمها OAuth 2.0.

———

📌 يعني إيه OAuth 2.0؟

ببساطة، الـ OAuth 2.0 هو بروتوكول authorization (مش authentication)، بيخلّي التطبيقات تقدر تاخد إذن من المستخدم عشان تدخل على جزء من معلوماته في service تانية (زي Google, Facebook, GitHub) من غير ما يعرفوا الباسورد بتاعتك.

يعني التطبيق اللي بتستخدمه مش بيشوف الباسورد بتاعتك، بس بياخد توكن مؤقت يقدر يستخدمه يدخل على الـ APIs اللي أنت وافقت عليها.

وده بيخلي العملية آمنة، وبيحافظ على الخصوصية بتاعتك.

———

📌 إزاي الـ OAuth 2.0 بيشتغل؟

تعال نمشي خطوة بخطوة في الـ flow المشهور بتاع Authorization Code Grant Flow، واللي بيستخدم في web apps

1- الـ User Requests Login
التطبيق (Client) يقولك: "سجّل بحساب Google مثلًا"، والمستخدم يضغط على الزرار، ويتم توجيهه على authorization server (زي Google).


2- الـ User Grants Permission
جوجل يطلب منك تسجّل دخول وتوافق على الـ permissions اللي التطبيق طالبها (زي الإيميل، الاسم، إلخ).


3- الـ Authorization Code
لو وافقت، Google هيبعت authorization code للتطبيق (أو تحديدًا للـ redirect URL اللي التطبيق حدده قبل كده).


4- الـ Token Exchange
التطبيق ياخد الـ authorization code ده ويبعت request لـ token endpoint علشان يبدله بـ access token (وساعات كمان refresh token).


5- الـ Access Protected APIs
بمجرد ما التطبيق ياخد الـ access token، يقدر يستخدمه يطلب بيانات من Google APIs، بس في حدود الـ scope اللي وافقت عليه.

———

إزاي بيأمن الـ APIs؟ 🔐

لو عندك API وعايز تأمنها، ممكن تستخدم OAuth 2.0 بحيث:

- أي Client مش هيقدر يوصل لـ API غير لما يقدّم Access Token صالح.
- الـ Backend بتاعك يقدر يتحقّق من التوكن (مثلًا JWT أو عن طريق introspection endpoint).
- تقدر تتحكّم في الصلاحيات عن طريق الـ scope (يعني مثلًا توكن معين يقدر يقرأ بس، وتوكن تاني يقدر يكتب ويعدّل).
- تقدر تسحب صلاحيات التوكن في أي وقت (Revoke).


بالتالي، OAuth 2.0 بيأمّن الـ APIs عن طريق إنه:

✅ بيقلل الاعتماد على كلمات المرور
✅ بيسمح بالـ delegation (تطبيق ياخد إذن من مستخدم يوصل لحاجة مش بتاعته)
✅ بيخلي الـ tokens مؤقتة، وممكن تتحكم في صلاحياتها ومدّتها

———

📌 أنواع الـGrant Types المشهورة:

- الـ Authorization Code (with PKCE): للموبايل والويب.
- الـ Client Credentials: للـ machine-to-machine apps.
- الـ Password (deprecated): كان بيستخدم لما المستخدم يكتب الـ username والباسورد في نفس التطبيق (غير آمن).
- الـ Implicit (deprecated): زمان كان بيتستخدم للـ SPA apps لكنه غير موصى به.

———

لو كنت بتستخدم OAuth 2.0 في موبايل أو SPA app، لازم تستخدم حاجة اسمها PKCE (Proof Key for Code Exchange) علشان تمنع الـ authorization code من إنه يتسرق.

———

وفقكم الله لكل خير 🌿