tgoop.com/rdeaa/39392
Last Update:
بدمعه ناديناك ياسيد البريه
ليش مايمك مـواكب للعزيه
ــــــــــــــــــــــــــــــــــــــــــ
هل امر بـگلوبنه ايـحز يبـو القاسم
والعفه اعلى الدنيا ياشيخ الهواشم
ابحضرتك مانسمع اقرايـه ومــآتم
ولانواعي اعله المصيبه الاحــمديه
ــــــــــــــــــــــــــــــــــــــــــ
بالمراقد نـنــظر اتــــصير المراسيـــم
تـزدحـم زوارها وبـالتـعزيـه اتـهيــــم
وحظرتك مابيها مجلس يبو ابراهيم
ولا شهاده العلــي حـماي الـحـمـيــــه
ــــــــــــــــــــــــــــــــــــــــــ
والله نـتمنه نجـيك ابلطم الاصدور
وبعزه الزنجيل يمك نحني الاظهور
نصيح زينب ياغريبه ابگلب مكسور
ونــقره بالله امنين اجتها الغاضريه
ــــــــــــــــــــــــــــــــــــــــــ
يمته آيـحسيــــــن نسمع عالمنابر
والبـيــارغ سوده وتــسر النـواظر
والعزاء بــحـظرتك يجبر خـواطر
وتسمع الزهره النواعي اعله السبيه
ــــــــــــــــــــــــــــــــــــــــــ
هم تجي الساعه ايتحقق بيها املنه
وتـحـت گبتك سيدي تـجمع شملنـه
والمواكـب تـحــــظر وتـخدم اهلـنـه
والزيـــاره اهنـاك تـصبح عـالمـيــــه
ــــــــــــــــــــــــــــــــــــــــــ
حيدر بشار الدراجي
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/39392