tgoop.com/rdeaa/39391
Last Update:
استشهاد الرسول (ص)
رايح.. يا فرحت روحي. وبلسم لجروحي.
وكل احلامي
رايح.. ياشمعة عيني.. بغربه تخليني.
هواي الامي
عني من تغيب
جرحك مايطيب
.....................
الزهره اني . والله بويه. موسهل هذا البُعد
بگلبي يجرح. واني ادري. بعد ليه ماترد
عفت بنتك فاطمه بدنية اذيه
بويه گلبي ينعصر كل مغربيه
منهو يستأذن يدك بابي عليه
الناس ماترحمني ياسيد البريه
بويه.. غمضت عيونك.. كبالي ايشيعونك
يابو الزهره
بويه.. حاجيني مروتك.. خل اسمع صوتك
گلبي تكسره
بنص روحي اللهيب
جرحك مايطيب
........................
نور وجهك.. غاب عني.. ونفتح باب الحزن
شلون اودعك.. بيمن ابدي.. وروحي لعيونك تحن
انته شاهد بويه لجروحي وعذابي
نار گلبي تصير باجر نار بابي
كلهه شمات ويفرحون بمصابي
مايراعون النبي وحرمة حجابي
داري.. منهه يحرموني.. ابجي يمنعوني
وذايب جبدي
داري..بنار ايحركونه.. وضلعي يكسرونه
وسطره بخدي
تعيشني بنحيب
جرحك مايطيب
...........................
شوف حيدر.. بويه حاله.. تغير وحيله انهدم
عله فراكك.. كوه يمشي.. وجدم يعثر بالجدم
الليله بفراكك علي الله اليعينه
قالع احصون الكفر ترجف يمينه
ماكطع نوحه ولا بطل ونينه
حزام ضهرك ضل غريب وتجري عينه
ذابل.. بغيابك ذابل.. يابويه وناحل
قالع خيبر
ذابل.. ومتغير لونه.. وكوه يكومونه
لامايكدر
ينده يالحبيب
جرحك مايطيب
.......................
حسين هذا.. ايسيل دمعه.. وشابج العشره بقهر
منهو غيرك.. بعد بويه.. ايشمه ويبوس النحر
يالحنين وبعد شيعوضه حنانك
بكل گلب يابويه ضل خالي مكانك
بكل مكان وكل وكت سيد زمانك
اذن اذان الحزن من راح امانك
روحي.. منك محرومه.. وضلت ملجومه..
غيابك حيره
روحي.. اذاهه مصابك.. ودعت احبابك
ضلمه الديره
يالنورك عجيب
جرحك مايطيب
..................
بكسر گلبه.. ينوح يمك.. والعيون شكد بجن
اينادي جدي.. رد عليه.. جبدي ذاب انه الحسن
اهل بيتك هاي حالتنه برحيلك
يامحمد هدلت امتون التشيلك
جنازتك مهيوبه يالماصح مثيلك
تلتقي هليله يالغالي بخليلك
ليلة.. موتك موسهله.. ياگلب يحمله.
اوداع الغالي
ليلة.. حزني ودمعاتي.. ووني وحسراتي
وهضمة حالي
بدلالي يصيب
جرحك مايطيب
محمد هادي العقابي
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/39391