tgoop.com/rdeaa/39384
Last Update:
قصيدة لاستشهاد رسول الله عليه وعلى آله الصلاة والسلام
،،،،،،،،،،،،،،،،،،،،،،،،،،،،،،،،،،
الما يمهه والد تنكسر وتطول الونه
يابويه مو مالت بعد يلشوفتك جنه
ونيت يم راسك واحاچيك
غمضت عينك وانه اشم بيك بويه
،،،،،،،،،،،،،،،،،،،،،،،،،،،،،،،،،،،،،،،،،،،
يا ماي عطشانه وردت من وجهك الماي
الما عدهه والد ما تسد وحشتهه الهواي
يا موت حيل استعجلت شو من وكت جاي
العايفهه ابوهه شما تون ما تطلع براي
تانيني يا موت انتظر
يا جنه مدفونه بگبر ؟
وي والدي بهداي اوصيك
غمضت عينك وانه اشم بيك بويه
،،،،،،،،،،،،
مهيوبه بويه ولا يمر خوف اعله بالي
ما دام سالم ما يهم كل الجرالي
يا غالي مثلك وين اكو يا اغله غالي
حاچيني چنهه اتحزمت سود الليالي
افتحلي صدرك والحظن
بنتك تره ويمك تون
شنهي اليبعد الروح ماذيك
غمضت عينك وانه اشم بيك بويه
،،،،،،،،،،،،،،،،،،،،،،،،،،،،،،،،،،،،،،،،،،،
شبساع تذبل يا ورد متگلي شبساع ؟
يلساكن بنص الگلب لا تسكن الگاع
لا وحگ شيبة والدي ما أحمل وداع
ضيعت كلشي بغيبتك حتى العمر ضاع
معذور يا نبض الگلب
فگد الابو كلش صعب
لو راح منك ما اخليك
غمضت عينك وانه اشم بيك بويه
،،،،،،،،،،،،،،،،،،،،،،،،،،
محتاره اظل بدنيتي لتغمض العين
وياي شد حيله الدمع ما قصر البين
چلماتك الكلهن هلا والملگه چا وين ؟
يمك واريد امروتك لتمد الايدين
لتسبل ايدك مو متت
چاوبني بويه اتمرمرت
باريتني وكل ظني اباريك
غمضت عينك وانه اشم بيك بويه
،،،،،،،،،،،،،،،،
يا بويه خلصت وانتهت غطاك التراب
من بعد عينك يلأبو ما ظلت أحباب
راح الامان بموتتك وگليبي ينصاب
من هسه محسن يستعد للعصره والباب
والدار باچر تحترگ
وتخلص الناس الصدگ
الينسطر خدهه اتعاين اعليك
غمضت عينك وانه اشم بيك بويه
،،،،،،،،،،،،،،،،،،،،،،،،،،،،،
كلمات الخادم
رعد الفريجي
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/39384