tgoop.com/qs3qw/8775
Last Update:
( ثكيل لشهاده الامام الحسن العكسري ع)
غربتك غربه ... ... وفركتك صعبه
الحسن مسموم مثل ذاكه الحسن
المهدي من شاف الابو عيونه جرن
غربتك غربه ... ... غربتك غربه
____
ابو المهدي يلوج ويلي من اثر ذاكه الحقد
السم مرد دلاله ابن الهادي ياناسه مرد
يابو صالح ايتيم تصبح ولليتم يله استعد
العسكري كرب رحيله وهاي ساعات الشدد
تعيش من دونه ... ... وماتشوفنه
الموت اجاه وذيج ايامه كظن
المهدي من شاف الابو عيونه جرن
غربتك غربه ... ... غربتك غربه
__
من يروح الوالد من البيت وتطفى شمعته
والله فيه اله تبين شلون جانت فيته
ابو المهدي والد النه شحاله اهله وشيعته
لو رحل ابن الاطايب وتفرح الي عادته
تفرح النواصب ... ... الحسن نوره غايب
شلون لو عيون ابو المهدي غمضن
المهدي من شاف الابو عيونه جرن
غربتك غربه ... ... غربتك غربه
____
وغمضت عيناه وسامره بلحزن امتلت
ويلي اعلى العكسري الاصوات اعتلت
انوار ابو المهدي ياويلي على الشيعه طفت
خمد نور العسكري ويتيم يامهدي صرت
الدمع وياك ... ... وعشره ماينساك
الدمع راح يذّبل اطراف الجفن
المهدي من شاف الابو عيونه جرن
غربتك غربه ... ... غربتك غربه
____
المهدي صلى اعلى الجنازه وشالها بمتونه
والشيعه بمصاب الي بيه كامو يعزونه
حكه ابو صالح على العسكري تمعه عيونه
وبجنب هادي العتره راحو يدفنونه
المهدي يحفر لحده ... ... وبترب وسد خده
شحاله كلب المهدي ابحين الدفن
المهدي من شاف الابو عيونه جرن
غربتك غربه ... ... غربتك غربه
_
من كظى العكسري ماعطشان ونحز نحره
ولا جروحه الف واكثر ولا سيوف توذره
بس الحسين بمماته خيل تسحك صدره
الله يعينج يازينب وحيدر علي والزهره
والعده هجمت ... ... والخيم شبت
وكل خواته ويه الغرب تدري مشن
المهدي من شاف الابو عيونه جرن
غربتك غربه ... ... غربتك غربه
الخادم : عباس محمد الحميداوي
BY الشاعر عباس محمد الحميداوي
Share with your friend now:
tgoop.com/qs3qw/8775