tgoop.com/qranhaeetalqloop/2764
Last Update:
كيف نصبر على أقدار الله المؤلمة؟
كلمتين سمعتهم في الصبر للدكتور مهاب السعيد
ولأن كلنا لا نخلو من امور نحتاج فيها الصبر فقولت اشاركهم
الكلام بيبدأ ب
هل ما أُصبت به من مكروه كان ظلم ليك؟
هل لو واحد اتصاب بالشلل هل اتحرم من حاجة كانت حق له
ولا وصل لنهاية وأقصى نقطة في الfree trial (التجربة المجانية) لشيء كان واخده من الاول بدون مقابل؟
لو لقيت واحد أعرج بيصعب عليك، هاجي اقولك ليه صعب عليك؟
هل صعب عليك علشان مبيعرفش يمشي ولا علشان انت واللي حواليه بيعرفوا يمشوا؟
والاجابة هي التانية صعب عليك علشان احنا حواليه بنعرف نمشي
والا لو كلنا عندنا عَرَج عمر ما كان حد هيشاور عليه ويقول ياعيني لان كلنا عُرج
فانت بتقيم الالم والمصيبة على أي أساس
ده الراجل ده مبيخلفش ياعيني طب ياعيني ليه؟ علشان احنا بنخلف
علشان في ذهننا ده أوبشن كان ممكن يحصله بس محصلش فبنعتبره حرمان
فالافتراض اللي بيقول الشخص المصاب ده انسان زي ما احنا انسان وبالتالي كان المفروض يتمتع بما نتمتع به نحن البشر
فبالتالي لما شيء ميتمتعش به هنوصفه بالحرمان
واحدة تأخر بها سن الزواج فزعلانه بافتراض ان حقها في الزواج كان دلوقت او قبل كده زي ماللي حواليها اتجوزا !
فالأقدار قد لا تكون مؤلمة بقدر انها زعل اننا مخدناش نفس الفضل اللي ربنا اعطاه لغيرنا
بمعنى اخر:
خلينا نتفكر في قدرة لو عندنا هتسهل علينا حاجات كتير زي الطيران
بدل ما تسافر ٣ ساعات لشغلك في المواصلات
كان ممكن تاخدها طيران في ربع ساعها بجناحاتك وسط العصافير
لو كل الناس كانت بتطير وانت الوحيد اللي مش بتطير؟
١٠٠% ده بالنسبالك كان هيبقى بلاء عظيم
وهي هي فكرة الشخص المشلول اللي شايف غيره بيمشي
يعني كل الناس بتطير وانا اللي جناحاتي متعطلة
عمر ما حد هيقول مؤلم جدا بالنسبالي اني مبطيرش زي العصافير لان مافيش حد من البشر بيطير
لان الافتراض المنطقي ان البشر ليس من حقهم الطيران فمش من حق البشر يسألوا انا ليه مبطيرش
فبناء ع الافتراض بتسأل والافتراض مبني على غيرك اللي عنده نعمة مش عندك
الفضل بيد الله يؤتيه من يشاء
لا تقارن بالاخرين
فكل شيء ونعمة في حياتك كانت بدون مقابل ومجانية
وكل نعمة لغيرك هي كذلك بدون مقابل ومجانية
ومن البداية ربنا قال مش هساويكم ببعض
انت متعرفش انت واخد ايه غيرك مش واخده
يمكن نكون متساويين بس بمجموع النعم
على اي اساس تطالب الله عز وجل انه يساوينا ببعض
كلنا متسولين
تخيل نويت تتصدق فطلعت ١٠٠ جنية اديتها لواحد وجنبه واحد تاني اديته ١٠
فيجري عليك ويقولك اشمعنا هو اديني زيه
ماشي ياحبيبي مانا مش مفروض عليا اديك اصلا
فمينفعش تقول انا محروم
لان اصلا ربنا فاتح لك حساب وحاطت لك فيه اكتر مما تستحق
اللي تستحقه صفر
ايه الحق اللي ليك عند ربنا ؟
كل شيء وكل نعمة بدون مقابل
كل اللي نستحقه صفر
انت واخد ٣٥ وبتقول انا ليه مش ٤٥ ..على أي أساس؟
ال٤٥تأكد انه يقدر يقول انا ليه مش ٥٥
وال٨٥ تأكد انه يقدر يقول انا ليه مش ١٠٠
دايما فيه فروق ودايما فيه الاعلى وبصتك للاعلى واللي محروم منه فانت مش واخد بالك ان ال٣٥ اللي مقومين حياتك دول
مش بتبصلهم اصلا وعمال بتقول انا عندي قدر مؤلم بسبب نقصان كذا في حياتي وهو عند غيري بيتمتع به
متقدرش تقول لو اصبت بالشلل اني اتحرمت من نعمة المشي
الحقيقة انك وصلت لنهاية التمتع المجاني بنعمة المشي اللي ربنا ادهالك
لو اصبت بفقد احد احباءك فهو بنظرة تانية انت وصلت لاقصى عدد من السنين بالتمتع بوالدك او حبيك او ابنك او غيره
مينفعش لما توصل لنهايتها تقول انت ليه حرمتني من فلان يارب
كأنك بتقول لربنا لما تيجي تنعم عليا بعد كده اديني عدد مطلق من السنين مش عاجبني اربعه وعشرة وستين
عاوز عدد غير محدود
انت هنا مش بس بتشترط على ربنا انه يديك نعم معينة
انت بتشترط عليه ان النعم دي يديهالك للأبد
والا لو ادهالك لفترة محدودة بتعتبر ان ربنا اداك نقمة لان لما تخلص الفترة المحدودة دي بتعتبر انه حرمك وابتلاك وجه عليك
BY القرءانُ حياةٌ للقلوب
Share with your friend now:
tgoop.com/qranhaeetalqloop/2764