tgoop.com/oriftolib/1388
Last Update:
#Сўраган_эдингиз
Бир жумла таҳрири
Гуруҳда “Олтиной, гўзал шеър яратибсиз! Ижодий бардавомлик тилаб қоламан, қадрдоним!” деган жумла, ундаги шеър яратибсиз иборасининг тўғри-нотўғрилиги ҳақида сўрашди.
Умуман олганда, жумлалар хато эмас. Лекин таҳрир нуқтаи назаридан нуқсонли.
Шеър яратибсиз – ўта китобий, баландпарвоз. Жонли тилдан йироқ. Унинг ўрнига шеър ёзибсиз дейилса, гап содда, самимий ва равон чиқади.
Яратмоқ сўзи инсонга нисбатан ишлатилганда қуриш, ясаш, ижод қилиш, бунёд этиш, барпо қилиш каби маъноларни ташийди. Бу ўринда йўқдан бор қилиш маъноси йўқ. Яратганга хос бўлган яратиш инсонга хос яратишдан мутлақ фарқ қилади.
Ижодий бардавомлик ибораси ҳам китобийроқ. Охирги жумла ўрнига “Ижоддан тўхтаманг” дейилса, қисқа ва лўнда бўлади. Агар тилак маъносини алоҳида таъкидлаш зарур бўлса, “Ижодингизга муваффақиятлар тилайман” дейиш мумкин.
Таҳрир кўпинча индивидуаллик касб этади, ҳар кимнинг ўз варианти бўлиши мумкин. Менинг вариантим қуйидагича:
Олтиной, ажойиб шеър ёзибсиз! Ижоддан тўхтаманг.
Эътибор берган бўлсангиз, гўзал сўзи ажойибга алиштирилди ва қадрдоним сўзи тушириб қолдирилди.
Ижод қилиш баландроқ тушунча, бошловчи қаламкашларга нисбатан ишлатиш унча тўғри эмас деган мулоҳаза ҳам бўлиши мумкин. Бу – асосли мулоҳаза. Унда жумлани бу шаклда таҳрир қилиш мумкин:
Олтиной, шеър ажойиб чиқибди! Ёзишдан тўхтаманг.
@oriftolib
BY Orif Tolib
Share with your friend now:
tgoop.com/oriftolib/1388