tgoop.com/omali1290/14
Last Update:
••❥ًً❀(•«﷽»•)❀❥ ••
اللهم صل على محمد وآل محمد 🥀
آآآه يا أم البنين
قصيده لمولاتنا أم البنين عليها السلام
بعنوان( سنين الأنتظار ) تقرأ بعدة اطوار
المستهل:
سنين إنتظار خلصت مرار
أبحسره وأنين
ماتت أم البنين
✿┈┈•• •✦♡✦• ••┈┈✿
مرت بالحزن السنين أبهظم وبآه وبدمعه
ظلت تبجي عل الأُولاد كل ساعه التمر تنعه
دمعات التهلهه ادموم بعمرهه انطفت جم شمعه
ضحت أربعه البنين لابن الطاهره البضعه
أوهِيِ تعتقد
ليهه يرد
هو كُرَة العين
ماتت أم البنين
✿┈┈•• •✦♡✦• ••┈┈✿
قدمت اربعه الاولاد قرابين الأبو اليمه
كالت كلهم يروحون فدوه لحرف من اسمه
وصتهم إله اتضحون ولتقصرون يا يمه
ليه من يرد سالم أشمكم بي من أشتمه
ضَحُوا العمر
لأبن الطهر
بس سالم حسين
ماتت أم البنين
✿┈┈•• •✦♡✦• ••┈┈✿
بِشِر من سمعته ينعه ابلهفه اطلعت مالومه
يِعَظملهَه الأجر كَلهَه البدور أموَذرَه بالحومه
ما نشدك عن الاولاد كلي حسين شعلومه
مكطوع النحر كلهه أضلوعه ابخيل مهشومه
وَجه الصبح
فوك الرمح
أمعَفَره الخدين
ماتت أم البنين
✿┈┈•• •✦♡✦• ••┈┈✿
كَظَت بالحزن السنين وبونات وبحسره
ثلاث سنين اتلاثين جن مرن على الحره
تصيح بصوت يمه حسين فراكك بالكلب جمره
ما يسوه العمر دونك يبني ودنيتي مره
حيلي أنهدم
قلبي أنثلم
من فراك الغالين
ماتت أم البنين
✿┈┈•• •✦♡✦• ••┈┈✿
ظلت للبقيع اتروح يوميه ابحزن تكصد
تبني من التراب اكبور تون وتنوح من تكعد
تحظن رَمِز كَبر أحسين اعليهه المكبره تشهد
تِكلَه بالوِلد ضحيت ردت سالم عليه اترد
تالي أنوجع
بيك أنفجع
مكطوع الوتين
ماتت أم البنين
✿┈┈•• •✦♡✦• ••┈┈✿
ثلاث اسنين عاشتهه اتاني رجعة الغياب
تكلهم صعبه يولادي الجنازه اتشيلهه الاغراب
وبالمنازع تدير العين الدربهم ولدمع سجاب
صاحت يمه يبنيني ابفكدكم كلبي طك وذاب
بآخر نفس
بولدي أحس
اتمنه موجودين
ماتت أم البنين
✿┈┈•• •✦♡✦• ••┈┈✿
خادمة اهل البيت عليهم السلام
أزهار جبار الجياشي
نسألكم الدعاء
ولفاتحه لروح والدي
غير مبري الذمه من يحذف الاسم أو يغيره وينسب الكلام له
من يشرفني بقرآئة ما أكتب فهو مخول بأضافة حرف أو حذف حرف وفقنا الله وإياكم بهذه الخدمه المباركه ببركات مولاتنا الزهراء عليها السلام
BY الشاعره والملا ام علي افضل الزينبي
Share with your friend now:
tgoop.com/omali1290/14