tgoop.com/nmpi1934/50306
Create:
Last Update:
Last Update:
▪️ Ájiniyaz atındaǵı Nókis mámleketlik pedagogikalıq institutında Ózbekstan jaslar awqamı baslanǵısh shólkeminiń ótken oqıw jılı dawamında alıp barǵan jumısların dodalaw, aldaǵı islenetuǵın jumıslardı belgilep alıw hám jaslar jetekshisin saylawǵa baǵıshlanǵan esap beriw hám saylaw májilisi bolıp ótti. Ilaj baslanǵısh shólkem aǵzaları hám studentlerdiń jetiskenlikleri sáwlelengen kórgizbe menen baslandı.
Búgingi kúnde institutta 13 mıńǵa shamalas studentler oqıp atırǵan bolıp, sonnan 30 jasqa tolmaǵan 9 mıńnan aslam studentler jaslar awqamınıń aǵzaları bolıp esaplanadı. Ótkerilgen májiliske olardan 200 delegat qatnastı.
Májilisti instituttıń jaslar menen islesiw hám ruwxıy-aǵartıwshılıq bólimi baslıǵı Aybek Bazarbaev basqarıp bardı.
Kún tártibine muwapıq, májiliste baslanǵısh shólkem tárepinen 2024-2025-oqıw jılında alıp barılǵan jumıslardıń juwmaǵı, sonday-aq, baslanǵısh shólkem jetekshisin saylaw hám onıń aǵzaları quramın tastıyıqlaw máseleleri kórip shıǵıldı.
↪️ Májilis kún tártibindegi birinshi másele boyınsha usı kúnge shekem institut jaslar jetekshisi bolıp islegen Bayrambay Gúlimbetov sózge shıǵıp, ámelge asırılǵan jumıslar boyınsha maǵlıwmat berdi hám ótkerilgen ilajlardan tayarlanǵan videorolikti delegatlardıń názerine usındı.
🔸Sonıń menen birge, ol kóp jıllar dawamında institutta jaslar menen birgelikte nátiyjeli jumıs alıp barǵanlıǵı, házirgi waqıtta ilimiy dóretiwshilik penen shuǵıllanıp atırǵanlıǵın esapqa alıp, jaslar jetekshisi lawazımın múnásip talabanǵa tapsıratuǵınlıǵın atap ótti.
Bunnan soń instituttıń jaslar máseleleri hám ruwxıy-aǵartıwshılıq isleri boyınsha prorektorı Quvondiq Qodirov, jaslar tálim-tárbiyasına juwapkerler hám delegatlar sózge shıǵıp, institutta jaslar menen islesiwde jaslar jetekshisiniń roli ayrıqsha ekenligi, Bayrambay Gúlimbetov bul wazıypanı birneshe jıllar dawamında ádiwli atqarıp kelgenligine toqtalıp, onıń aldaǵı jumıslarında tabıslar tiledi.
🔹Májilis kún tártibindegi tiykarǵı másele boyınsha Ózbekstan jaslar awqamı Oraylıq Keńesi hám Qaraqalpaqstan Respublikası Keńesi juwapkerleri tárepinen ótkerilgen sáwbet nátiyjelerine muwapıq, jaslar awqamı institut baslanǵısh shólkemi jetekshisi lawazımına Qasımov Erniyaz Ájiniyaz ulınıń kandidaturası usınıldı.✅ Solay etip, delegatlar tárepinen dawıs beriw jolı arqalı institut jaslar jetekshiligine Qasımov Erniyaz Ájiniyaz ulı saylandı.
Maǵlıwmat ornında atap ótiw kerek, Erniyaz Qasımov 2024-jılı instituttıń milliy ideya, ruwxıylıq tiykarları hám huqıq tálimi bakalavr baǵdarın tabıslı pitkerip, usı kúnge shekem ruwxıylıq bólimi metodisti bolıp jumıs isledi. Onıń jaslar menen islesiwde tómengi buwınnan baslap toplaǵan tájiriybesi hám ámelge asırıp atırǵan jumısları esapqa alınıp, usı jılı Qaraqalpaqstan Respublikası Joqarǵı Keńesi Prezidiumı qararı tiykarında «Úmit ushqını» kókirek belgisi menen sıylıqlandı. Sonday-aq, ol házirgi waqıtta magistratura basqıshında mámleketlik grant tiykarında oqıwın dawam ettirmekte.
🔖Májilis dawamında Erniyaz Qasımov sózge shıǵıp, bildirilip atırǵan isenim ushın institut hám jaslar awqamı basshılarına, student-jaslar atınan qatnasıp atırǵan delegatlarǵa minnetdarshılıq bildirdi hám aldaǵı rejelerin tanıstırdı.
Sonday-aq, ilajda delegatlar tárepinen jaslar awqamı baslanǵısh shólkemi joybarlarınıń koordinatorları da saylandı.
Ilaj juwmaǵında delegatlar sózge shıǵıp, búgingi saylanǵan jaslar jetekshisine kelesi jumıslarında tabıslar tiledi.
Bizdi baqlap barıń
