tgoop.com/my_memo/7944
Last Update:
جربتا تولد واحدة وتبوظ ليك هدومك وتملاك بمويه الجنين ..أو فضلاتها أثناء الولادة وتكون مبتسم ابتسامه صفراء لانو انتا عارف انو دا غصب عنها وغير أخلاقي منك انك تبين انك قرفان منها ...
جربتا انو العيانة من شدة الم الولاده ممكن تستفرغ علي السرير وانت بتفحصها ...
عارف يعني شنو تفحص عيانين على مستويات متفاوتة من النضافة الشخصية .......
جربتا تتعامل مع عيانين ريحتهم ما حلوة وماتقدر تقول ليهم كدا ....
جربتا تشوف ملابسك الداخليه اتملت دم لما تدخل عمليه قيصرية وتنسى تلبس ماكنتوش ..فتلقى الدم مالي جسمك ومالي لبس العمليات ووصل ملابسك الداخليه ...
جربتا تجري وأنت شايل أكياس الدم من بنك الدم عشان عيانة بتنزف كتير ...
جربتا تطعنك ابره وانت جوه عملية ودمك يختلط بدم عيان ...
جربتا الدم يطير ويملا وشك أو يدخل
عينك ...
جربتا تمسك بيبي بيتولد فجأه بيدك من غير جونتي عشان مايقع علي الارض
جربتا تعمل تنفس اصطناعي لشافع من خشمك لخشمو طوالي لانو مافي جهاز بتاع تنفس اصطناعي قريب منك
جربتا في الساعه ٣ صباحا في عز الشتا وأنت نفسك تنوم وتتدفأ وتدخل عليك عيانة غرقانه في دمها وامورك تجوط وتتصل للاخصائي يجيك من بيته في ساعة زي دي...
جربتا تتشاكل مع زملاك عشان عاوز تدخل عيانة في عنايه مكثفه عشان انتا خايف حالتها تتدهور.. أو عشان تجيب ليها دم او تعمل استشارة لتخصص تاني أو تطلع نتايج المعمل في اسرع وقت ...
جربتا حفلات الكواريك الجماعيه لما الغرفه يبقى فيها اكتر من 10 عيانات كلهم بيولدو في نفس ذات اللحظة وأنت نفسك تنوم
جربتا انت وزملاك تتحايلو على بعض منو يكشف او يشتغل عمليه لعيانة أيدز أو فيروس سي أو جرب ...
جربتا تعيش فى المستشفى بالأيام
جربتا تواصل 36 ساعة من الشغل ما ترتاح لحظة
...
قرفتو؟؟؟ ...انا آسف احنا كمان بنقرف جدا ...وبنحب النضافة جدا ...بس ماينفع نبين قرفنا منكم في أضعف لحظات حياتكم .
وطبعا ماجربتو كل دا لكن جربتو تشتمو وتهينو وتنتقدو
لو لاقيت دكتور بيفطر أو مشى الحمام. . او رافض يشتغل بدون وقاية أو بيطالب بحقوقه وجربتو تصنفو الدكاتره علي هواكم دا شاطر ودا بليد
عمرك قلتا الدكتور الساكن جنبنا دا مابصحيهو ٣ صباحا عشان دا وقت راحتو ولا بتقول لازم اصحيهو دي حاله إنسانية وانتا عمرك ماقدمتا ليهو خدمه انسانيه
بتطلبو الإنسانية والرحمة وقت ماتكون على هواكم بس..
لما تمشي لدكتور ومهما كنتا خايف علي مريضك قابلو بابتسامه بس ابتسامه وشوفو كيف يهتم بي مريضك.. قريبك البموت قبل ماتفكر تضرب الدكتور اعرف انو الدكتور اتألم ميه مره علي قريبك دا لانو فشل في علاجو وخليك متأكد انو عمل كل العليهو لكن القدر سابق .. ماممكن عيان مضروب طلقه ويموت تجي تلوم الطبيب .. الطبيب حالف قسم يعالج الغريب والقريب ا اللاديني والمسلم كلكم مابفرق بينكم.. اديهو كلمه طيبه لانو انتا لو تدري كل الاطباء في المستشفيات شغالين براتب يعادل ١٥٠٠ جنيه في الشهر
ربنا يقوي الجيش الأبيض يا رب
BY خــــــواطر وثقافات
Share with your friend now:
tgoop.com/my_memo/7944