tgoop.com/mstfa45/971
Last Update:
#اقسى_غربة
#سماعي
ها يخوتي ترسوا اذني
وصيحوا زينب..باجر اعطش حته لاسمي
والعطش للاسم صعبه
اقسى غربه
اسمي المسمي ابوي اتغيره غربه
اقسى غربه
اسمي ذاك الكتبته الزهره بگلبها
يجي الذباح بگلب بارد يشطبه
واسمي لا مطلوب ثار ولا محارب
ليش هاي الناس متحزمه ووتطلبه
ااخ باجر..اسمي عاشر..ولازم تبوگه الحوافر
اخ باجر..اطب زينب واطلع ابلا اسمي باجر
اخ باجر
ينوخذ من عندي كلشي
ينوخذ مني اخوي وخيمتي وحرية اديه
باجر اومي بكيف حبلي..باجر امشي بكيف غربه
وماكو ممشه بكيف اهلي
باجر اول مره يتأشر عليه
الناس كلها تصيح زينب هاي هيه
وهاي هيه..
باجر يغيرون كلشي
امشي للتل بسوادي
وارجع ابيض لون رمشي..
وجان اكو ابالي سؤال
المالهه اخوان وغريبه شلون تمشي
وراح ادري شلون تمشي..
واگرب اگرب ها يموتي
ووين زينب لو حچوها اگبالي غربه
وين زينب لو حچوها اگبالي اخوتي
اگرب اگرب ها يموتي
باجر يسمعون صوتي
صوتي غربه
شلون غربه
اگبال عينك راس اخوك
ومن تريده اتطلبه طلبه
اقسى غربه
راس اخوك يصير طلبه...؟؟
راس اخوك الصلّت بوجهه الترابه
من حضن امك الزهره لحضن تنور وخرابه
وهيه حيره
البدلو جسمه برمحهم
منين تسمع حچي گلبه
بنص صفنتي طفله كوه تحاچي بيه
وجاي افرك عيني فجأة وشفت حبلي ابين اديه
واطلعت حلمانه باسمي
اسم ذاك الجان زينب قبل لا اصيرن سبيه
وجابو الروس بخرابة وگابلتهن
الدم اوخره بجف ادي ومشطتهن
عتب مشتاگه كعدت وعاتبتهن
ها يخواني الشوگ يكبر..ما كبرني الشام وضيمه
زينب هاي التمشي بهزلة..تحن لزينب ام الخيمه
مصطفى صادق اللامي
BY قصائد مصطفى صادق اللامي
Share with your friend now:
tgoop.com/mstfa45/971