tgoop.com/mstfa45/938
Last Update:
#شور_فزعه
گلبي لمّن هواك
ضل يمشي بس وراك
وما دور بس رضاك
يا فرصة مو مثل الفرص
گلبي اكتفه بيك وخلص
اكسرلي جنحان الگلب
واقفل علي باب القفص
حته بعذاباتك ترف
ويا جو عزائك يختلف
انه العرف وي دمعتك
وبس انته متضيع العرف
روحي وياك..ما تجي الروحيه وي أي ثاني
انته مسلوب..وانته سالب مني كل وجداني
خذني مولاي..على گد عقلي اعلگد الساني
________
اسلبني الاختيار
كون ابقه ابلا قرار
ووياك اگضيهه صار
وهوه اليحبله منذبح
ميدور بدنياه ربح
اذبحني واستعجل علي
هم يله اشيّب عالرمح
همّ يله اموتلك بچي
ماريد احبك بس حچي
الميتله واحد من هلّه
بفاتحته ميضل منتچي
على الوجدان..لا عزيز ولاكو حاكم غيرك
جتفي يحسين..كبّر منك سيدي ومن خيرك
ها يعطشان..اسنيني دبرها بحسّن تدبيرك
______
يا عاري الفلوّات
ريجك ذل الفرات
جرحك ينزف حياة
بكل صورة اشوفك انفجع
ساكت وحچيك ينسمع
يحن صدري بس اللطمتك
شيعودلك هذا الضلع
شايلنه شيلة رايتك
وقوّت الگلب بس دمعتك
ما شايلك جان الرمح
اگلوب التخدمك شالتك
الاعمه مولاي..هذا التجيبه انته بس ما شافك
يخسر هواي..الصدّت گلبه ونسه گلبه وعافك
كلشي مولاي..يرخص ويغله الحزن لشفافك
______
يا حبل الله المتين
دمك ملح السنين
باحزانك استعين
يجذبني كلشي انته بي
حته انكسارك والسبي
شكد دورت بين القصص
ماكو اعلكد جرحك نبي
حزنك لحد ربك وصِل
ولتجننه اخيامك عقّل
ياهوه گبّلك منذبح
ويقروله يم صحنه غزل
ضامي منحور..انّعز عليك الچفن يا مولانه
دنيا وتدور..((ناس خيّره ومالهم دفانه))
كلها بگبور..وبس جثثكم بالشمس عريانه
_____
يا عرفان العبيد
بگلبي رايح بعيد
بكيفك ابقه اريد
اسلبلي الاسنين البقن
لو مجلسك لو بالصحن
وباذني خليهه ترن
اجراس نوگك والضعن
يالماتفشل سائلك
هذا انه منك بس الك
وبالليل احس بيه نقص
لو ما جداوه اتوسلك
أاسري بيه..من حياتي لوحشتك واحزانك
رتبه گلبي..وخلني اعيش بدمعتي انسانك
عبدك هواي..اقسملي كون ابقه عبد غلمّانك
#مصطفى_صادق_اللامي
BY قصائد مصطفى صادق اللامي
Share with your friend now:
tgoop.com/mstfa45/938