tgoop.com/mstfa45/906
Last Update:
#شور
سلسبيل الحب دمعتي ... التروي أغصان امنياتي
وكربله محراب گلبي ... والحزن صومي وصلاتي
عايف الدنيه وأهلها ... هاوي الحسين برضاتي
وگلبه لو يرضه بخدمتي ... مكسب آخرتي وحياتي
سر وجودي كربله ومضموني
وكل حزن گلبي وبواچي عيوني
ولون جون امنيتي يصبح لوني
بالمهد ناغه الي ... هيامه
وانطقت ياعلي ... بكلامه
وأمّناني وهلي ... بسلامه
والدموع اتغلي ... لخيامه~~~~~~~~~~~~~~~~~~
كلشي هين مايهمني ... بس بالحسين اهتمامي
خل تضيع الدنيه مني ... ولا أضيّع وجه إمامي
مات طعم الماي عدي ... من صفه الروّاي ضامي
من صفه حامي الشريعه ... ابلا مناصر لا محامي
كلشي مات وهو عاش بروحي
ومن عليه أگطع حبل نوحي
أنظر الماي وأهيّچ جروحي
حبيبي بحر ظهر ... أشوفه
ابلا أخو ومنكسر ... ظروفه
والنهـر تحتضر ... جروفه
عالترب تعتذر ... چفوفه ~~~~~~~~~~~~~~~~~~
گلبي عاش بجو عزاءه ... بكل مسه ومصباح اقيمه
الله ليديمك يگلبـي ... لو عزاءه ماتديمه
امن العليله اتعلمتها ... دنيه دون حسين هيمه
لا إنس بيها وعوافي ... وماكو مثل حسين خيمه
خيمتي المنّه الهوه لأنفاسي
بنعي ابن حذلم يعيش احساسي
وفوگ راسي طينه رافع راسي
حققت دمعتي ... مناها
بخيمته عِزتي ... أحتواها
ورحمته لريتي ... هواها
قاصره خدمتي ... ورضاها
~~~~~~~~~~~~~~~~~~
عايشت جرحه قصيده ... تسري دم ودمع بيه
شگد خواطر بيها ثكله ... شگد صور للغاضريه
ومن اشوفن طفله تبچي ... دمعي ياخذني امن اديه
للدلال البالخرايب ... لدمعة الطفله رقيه
طفله بااحضان الطشت نومتها
شوگ أبوها والسبي موّتها
ميتـه ولكـن تنسـمع ونتها
ياسبـي الغرايب ... ظليمه
وبت علي بخرايب ... هضيمه
اعليهن المصايب ... عظيمه
وغيبة الأطايب ... أليمه~~~~~~~~~~~~~~~~~~
سجاد الگريزي
.
BY قصائد مصطفى صادق اللامي
Share with your friend now:
tgoop.com/mstfa45/906