tgoop.com/mstfa45/903
Last Update:
#شور
مّن الخيمه للتله..تشيب چم مره وطفله
الذبحو اهله كدامه..زينب حيره شتگله
وانه البارد بجرحي..حسبت دموعي واسنچ
وااخ جروحچ التسعر..بنص الخيل ودنچ
امشي براحتي ابدربي..وتالي احبال مشّنچ
ما واصل امصبيتچ..ولا راكض لركضتچ..
ما مره ماشي بحبل..اولا طايح امن الهزل ..
________________________________..
ركضن والهوه ايعثر..وركض المستحه يكبر
ويم حسين ما يبچن..بچيهن خلص اتأشر
وسكته دمعتچ صبت..وبچي السكته يطلع الروح
وانه الكاعد ابخيرچ..وحاسب روحي هم مجروح
اگبالي الناس مبتسمه..واگبالچ نحر مذبوح
وتهضم بواچي الگلب..وبراحة دمعي يصب..
امناشغ گضيتي الدرب..وضعنچ يماشي الغرب..
__________________________________
وما تعرف السادة النار..ومتفرق اصغار اكبار
الما مچوية بالخيمه..يچويها الرمل چي حار
مرتاح العمر كله..وحاسب وگلبي متچّوي
وانتي اخيامچ احترگن..ورد يمچ سرج ملوي
العدها اطفال عطشانه..حيره تحير شتسوي
واليركض ابلايه عم..يشربونه مو مي سهم..
وشيخ السگه اعللنهر..كاسر ضهر وانكسر..
__________________________________
يزينب يا مصيبه تهون..وجبير الخيمه ما مدفون
جابوا راسه يم النوگ..تبچين انتي ويضحكون
ما شايف رمح ينهز..واصيّح روحي محترگه
وبطولي امشي مترهي..ورقيه تمشي ومدنگه
اشوف وما شبگت حسين..وهيه ابلا ضوه تشبگه
لبگلبه شايل وطن..ما فوگه وصلة چفن..
ضل عاري محد اله..ويچوي رمل كربله..
______________________________________
ورغم جرحچ تكفّلتي..وعباس الضعن صرتي
وهوه برمحّه صيحلچ..هلا بزينب هلا بأختي
مثل طبّت عصا موسى..عباتچ للقصر طبت
جم زهره يزينب بيچ..صدگ ما ماتت الربت
واحبال الي بجفوفچ..احبال اعدامهم صبحت
بيهم يضيگ القصر..احبالچ علامة نصر..
انهز كلشي بس انتي لا..يا سيدة كربلا..
__________________________________
BY قصائد مصطفى صادق اللامي
Share with your friend now:
tgoop.com/mstfa45/903