tgoop.com/mstfa45/860
Last Update:
#لمولاي_الحجه_عج
تسد بيبانها وترتاح..العالم من يصير غروب
ويا عمتك تسد ياباب.. ما بيها الخرايب بوب
ها يا يوسف الزهراء..بناسك ماكو شح يعگوب
ومن نامت الحره بخرابه
هم غمضت بالليل عينك...؟؟
وتسمعها كل ليلة تندبك
فك حبل ادي يا مهدي وينك
لحد هسه من الشام گلبك محروگ
اذنك تسّدها لو يمر طاري النوگ
وتختنگ كل ما ذكروا العلويات
وصاحب الثار يموت لو ضل مخنوگ
________________________________
ضعنك هذا مو سبحه..ليش العالم تفره
وحبلهن مو دلو بنص بير..شجاها الناس وتجره
عيونك جن عبايتهن...من كثر البچ‌ي حمره
بعينك تشوف ادموع ضعنك
وتجيب ماي و تبچي يمهن
وبذنوبي اعثرهن اجدامك
وما اخلي مايك يوصل الهن
اچم مره ناوي تنام وبهيده تبات
ويعرض على عيونك ضعن مسبيات
ومن نومك تفز يابوصالح وتصيح
اذبحني انه وعوف هالترچيات
_____________________________
عمرك ينحسب ضعفين..الغربه اتكبر الفاكد
تشابيهك ولا تمثيل..بس تغمض تشاهد
تشوف الشمر وفعاله..وين بيا صدر كاعد
شرد احچي ودري الطف يغايب
مثل الرمش ما عاف عينك
اچم مره متحلم يمهدي
وي السبايا امچتفينك
شمسوي بيك الشيب ها يمولاي
گلبك يضل يرجف اذا تشرب ماي
تتخيل اشصار بمحرم بحسين
يركض يلملم ذيج تتطشر هاي
__________________________________
يمهدي الهزله من تميل..تميل وياهه علوية
يالبعينك حمّار اغروب..ذبحو ضحكت ارقيه
بس گلبك صدك مچوي..ماكو اگلوب مچويه
ونوم الخرايب يابوصالح
مو زين عالطفله الصغيره
الثامك يمهدي ذبه فدوة
يا اخر ازلام العشيره
مولاي اشهر سيفك وشد اعنان
بس انته طلاّب البقيت العدنان
كل القبايل خذتهه نسوتهه هناك
وبس الهواشم ضاعتلهم نسوان
___________________________________
اعلكد حاجتنه من نتوب..ومن تخلص نرد نذنب
تره يغير الحب الناس..ومتغيرنه اذن منحب
خايف لو رجع ضعنك..المثلي بضعنك يسلب
وبذنوبي عطلتّك على اهلك .
وانوب أگلك عجّل النه
كل خوفي طف ثاني نسوي
وهم تنغدر لو ترجعلنه
شكد بايعك بس مشتريني بكلهن
شما اغلط انته اغلاطي لتصلحهن
الباعاني بعيوبي يعدد مولاي
وگتله اسكت انه المشتري وقابلهن
__________________________________
رزقهم
مصطفى صادق اللامي
BY قصائد مصطفى صادق اللامي
Share with your friend now:
tgoop.com/mstfa45/860