tgoop.com/mstfa45/1375
Last Update:
#يا_زينب
في أخر ليلة لمولاتي زينب صلوات الله عليها
نادت ابن اخيها وحبيبها مولانا السجاد صلوات الله عليه لتخبره بكل الاهات والمواجع وتعيد ذكرياتها الاليمه فنادته
وقالت::
عمه اكعد يسجاد
موتي الليلة ينراد
قبل لا قصري ينعاد..يا غالي
ما تنعاد هيهات
وگفه اباب ساعات
اموت ولا امتانات..يا غالي
علي رفجه جرح گضينه الايام
بس گلبي عليك شكد قهر ضام
اكعد خل افك جروحي وياك
اخر ليلة اريد اشكيلك الشام
اكعد واسولفلك جرح..ناگه ورمح..لمفرقه خوان
ما كتلك بجرحي ابد..حالك اشد..بگيودك احزان
بعلتك تركضلنه واسكت اجبار
بگلب زينب ولا كتلك شني الصار..يا عمه
____
بعمتك عالتل شصار
بين الذبح والنار
شكد جان الرمل حار..ما كتلك
الجرح مو جلمة ينكال
الجرح ينعاش جتال
شسوت بيدي الاحبال..ما كتلك
جنت عنك اضم يالجرحك الماي
ضعن كله نسه وبس انته حماي
خذو عوجية ايدك عمة وانطوك
سناسل فوك علتك والبجي هواي
اسكت واضم جنت بحزن..حبلي خشن..واكيدوك اهواي
وحال العقيلة ما يسر..ناكة وهجر..ويكتلني كل ماي
ومن شعلو يعمه بخيمتي النار
بگلب زينب ولا كتلك شني الصار..يا عمه
_____
هذا الحال ميلوگ
محد نوخ النوگ
واصعد گلبي محروگ..مجبوره
عمه ايمين واشمال
گلبي اويه الهزل مال
وساكت گلبي ما گال..مجبوره
تره بليل الخرايب ما شفت نوم
شينومني واعلينه امخاطف الكوم
واغمض لا اجرحك من احس بيك
مثل طير الكطه فوك النسه تحوم
بليل الخرايب ما نمت..انعه جنت..خواني و الروس
اتأشر كضه دمعي الجره..ونعيي تره..هم مثلي محبوس
اسكت وانجوي بدمعي لأن حار
بگلب زينب ولا كتلك شني الصار..يا عمه
____
موتي الوحده موضوع
عمه عوف الدموع
ضعنك بعده موجوع..شيسكته
من حسين امانات
اطفال ومضعنات
شي بخيولهم مات..شي سكته
من اول خرابة لطلعت الروح
ننقص ليلة ليلة اطفال وجروح
بعز موت البنات وفكد الاولاد
يضل جرحي الجبير حسين مذبوح
انه وحليب ام الحسن..نكبر زمن..وننعه اعللحسين
لمصابه ما يكفي وكت..ولا نوح اخت..ولا دمعة العين
بگلوب الثكالى نعيي ما مار
بكلب زينب ولا كتلك شني الصار..يا عمه
____
گرّبلي امنازع الروح
وحبيبي حسين مذبوح
ماتت اخته التنوح..يا عمه
وصيتي بكل وكت دين
بلل عمه كل عين
غير الميت حسين..يا عمه
وسلملي اعلبوك وگله وياك
عدلة وميته مجبوره اعلفرگاك
رقية الخلت اختك ترجع لشام
لو ما موت بتك ميته فوگاك
وحدها والدنيا قصر..شام وكبر..واليمهه شمّات
امنيتي مو ابيض جفن..اسود لأن..عندي اخو مات
زوار اعلگبري مرو زوار
بگلب زينب ولا كتلك شنو الصار..يا عمه
BY قصائد مصطفى صادق اللامي
Share with your friend now:
tgoop.com/mstfa45/1375