tgoop.com/mstfa45/1250
Last Update:
#لمولاي علي ألاكبر عليه السلام
#ثگيل
ودعني بعيونه ومشه مات الحچي بلساني
لو رحت مني يالولد. ما عدي أكبر ثاني
بدلالي مر صوت _ رايح علي يموت
_____
يربات چفي لو رحت معناهه أولم گبري
لاتطري الوداع انهظم ولاتمتحني أبصبري
خطواتك التبعد علي طعنات تحفر صدري
ياروح ابوك وعالمه. بلياك موحش عمري
ياعشگي ولهفة روحي انته عزيز حسين
يالوجهك نوره محمد مثله. نجيب منين
يالطولك فيء لخواتك . يبني ينور العين
غير انته سباح الگلب نبظي وترافة روحي
مابيه اعوفك للذبح. فراگك مراري ونوحي
يهل دمعي بسكوت _ رايح علي يموت
_____
من هلن دموعك بدي موخوف جانن عشره
ماينحمل فگد الابن شلون اذا گطعو نحره
مخظر عالمتونك ورد خوفي ألخيول أطشره
خايف ظلوعك تنكسر تردني الهذيچ الكسره
فاطم گبلك ماسلمت لچمه. تهد الحيل
من يا حافر تتكتر. كثره تراهه الخيل
وسيوف تحز بنحرك كلشي. وراك يميل
يوليدي تنشال أبرمح وينشال بعدك راسي
أتمنيت يمك. تنگطع يابعد حيلي انفاسي
يلم جرحي تابوت _ رايح علي يموت
_____
تحتاجك هواي الخيم. نور وأمان وبسمه
لليله بدمعهه اتناظرك من عدهه رايح زلمه
واختك َّسكينه ياعلي تنحب وراك أبهضمه
يل ألاكبر خلافك تره گلب الحسين أتلچمه
بخيامك تبدي نوايح تشكي جرح فرگاك
يا گمرة ولليله تناشد صاحت أموت أوياك
امك ورباهه تريده بحرگه بچيهه. أهناك
يتعبني موتك موعطش يانهر يشبه عينك
لوگتلي نتباره الذمم. معناهه مات حسينك
لموتي انه زاتوت _ رايح علي يموت
_____
للعازه مريود الولد. بس انته صرت العازه
محتاجك لحيلي متن بس شلتك انه جنازه
ما ترهم يطيح النده وأعله العطش نتوازه
اليهظم بنادم مو ذبح. ذباحه فگد. أعزازه
من نحرك يبني اشمك هسه صبح منحور
عله طولي طحتلك وانه. دمي عليك يفور
شابگتك ظامي لگيتك بويه گلت معذور
ياشوغة عيون الگلب أبگد. حبك امتعبني
نومك ترا بذيچ الترب منكل. كتر جارحني
فت گلبي مفتوت. _ رايح علي يموت
____
للمثلك يلوگ العمر مو وكته بويه صوابك
ينشم البعمرك ورد الهاي الرماح شجابك
ياحيل بعدك مايرك طولك حياة احبابك
بعدك عله الدنيه العفا لو غمضت بترابك
يل ألأكبر انت حلالي روحي وراك تروح
يغديلك فدوه عدوك وانته محنه اتفوح
مابيه اعوفك دامي بهيمه جسد مطروح
صوبني دهري بغربتي. مذبوح ليش گبالي
ظيم العلي ماينوصف. وصار الفگد كتالي
أللحظة ابچي تفوت _ رايح علي إيموت
____
#قصائد محرم الحرام ١٤٤٥ هجري
سيد عباس الفاضلي
BY قصائد مصطفى صادق اللامي
Share with your friend now:
tgoop.com/mstfa45/1250